باکو۔ 09 اکتوبر (اے پی پی) آذربائیجان اقتصادی کمکار تنظیم نا وزیر آتا کونسل نا 27 می دیوان نا (اینو) سے شنبے نادے آ مہمانداری ءِ کیک، نگران وزیرخارجہ جلیل عباس جیلانی دیوان اٹی پاکستان نا نمائندگی ءِ کیک۔ اقتصادی کمکار تنظیم نا وزیر آتا کونسل نا دیوان آذربائیجان نا شار شوشاٹی مریک۔ آذربائیجان نا وزیرخارجہ جیہون بیراموف و پاکستان تون اوار ای سی او نا باسک ملک آتا وزراء خارجہ دیوان اٹی بشخ ہلیک۔ وزیرخارجہ جلیل عباس جیلانی اقتصادی کمکار تنظیم نا وزرانا کونسل نا دیوان اٹی بشخ ہلنگ کن 9 آن 10 اکتوبر اسکان آذربائیجان نا سرکاری دورہ ءِ کیک۔ وزیرخارجہ جلیل عباس جیلانی کونسل آف منسٹرز(سی او ایم ) آن تران کیک و دود انا وخت آ باسک ملک آتا وزیر و ایلو اہم شخصیت آتون ہڑتوم آکنڈآتا اوڑدہی ہم کیک۔ وزارتی کونسل ای سی او نا پالیسی سازی فورم نا وڑاٹ تنظیم نا فیصلہ و سالانہ ورک پلان نا منظوری ءِ ایتک۔ 27 می سی او ایم اٹی باسک ملک آک واپاری و اقتصادی کمکاری و راجی دودوربیدہ ئی، تکنیکی و سائنسی بشخ آتیٹی تین پہ تینی کمکاری نا کمک اٹ ای سی او ڈیہہ انا پائیدار اقتصادی شونداری نا مون آ دننگ آ گپ وتران کیک۔ داسال انا دود انا سرحال ’’گرین ٹرانزیشن و انٹر کنیکٹیویٹی ‘‘ مریک ۔
