پاکستانی الس دا مشکل نا ساہت اٹی تینا فلسطین ایلم تتون سلوک ءِ، پاکستان مسلم لیگ (ن) بلوچستان نا سینئر مرکزی راہشون چوہدری نعیم کریم

کوئٹہ۔ 09 اکتوبر (اے پی پی) پاکستان مسلم لیگ (ن) بلوچستان نا سینئر مرکزی راہشون چوہدری نعیم کریم بے گناہ و کودک فلسطینی الس آ اسرائیلی جہاز آتا وحشیانہ بمباری ٹی سد آ بندغ آتا شہیدی و ٹھپی مننگ نا مذمت ءِ کرسا پارینے کہ پاکستانی الس دا مشکل نا ساہت اٹی تینا فلسطین ایلم تتون سلوک ءِ، پاکستان مدام فلسطین موقف نا مخ تفی ءِ کرینے داسہ اسرائیل نا دا ظلم و جور و وحشیانہ جارحیت نا برخلاف توار ءِ حق بڑز کننگ نا وخت بسنے، انسانی حق انا تنظیمک دمدستی وڑاٹ اسرائیلی جارحیت ءِ تورر، اقوام متحدہ و او آئی سی فلسطین نا دمدستی پرامن ایسری اس کشر۔ داڑے جاری مروک اسہ بیان اسے ٹی اوپارے کہ پاکستانی تا است مدام فلسطینی الس تون دھڑکک، فلسطین نا غیرتی الس و امت مسلمہ وخت اس ہم ناروا اسرائیلی صیہونی ریاست ءِ امنا کپسہ،فلسطینی مسلمانک ایمانی غیرت نا درشانی ءِ کرسا مچ آ دنیا نا مسلمان تا است ءِ کٹانو۔ چوہدری نعیم کریم پارے کہ مظلوم فلسطینی اسرائیلی ظلم انا ردعمل اٹ اسرائیلی فوج ءِ ورندی تننگ آ بیوس مسنو ، ہراتم دہائی تیان مظلوم ءِ لتاڑنگ نا بے سلنگ آن  چرجوئی  برجاسلک تو ردعمل فطری ہیت اسے، جہانی دنیا و اقوام متحدہ اسرائیل، فلسطین جھیڑہ ءِ بامسخت مذاکراتی عمل نا کمک اٹ ایسر کننگ کن کڑد ادا کیر۔ اوپارے کہ فلسطینی الس تدوک آ کہی دہائی آن بدترین جور و بیدادی تون مون تننگ ءُ ، واک انا زور آ فلسطینی تا حق ءِ کُننگ انگ ءِ ولے جہانی واکدار آک تینا خن و باہ ءِ تفینو۔ اوپارے کہ ملی غیرت نا خواست ءِ کہ عالم اسلام فلسطینی تتون پبی یکجتی نا درشانی ءِ کے، ہراوڑ امریکہ اسرائیل نا ہرممکن کمک ءِ کننگ ءِ اسلامی دنیا نا واکدار ملک آک خاص وڑاٹ پاکستان دا چرجوئی ٹی خصوصی وڑاٹ تینا توار ءِ بڑز کے و تینا فلسطینی ایلم تے دامشکل ساہت اٹ اخلاقی، راجی و زرگزرانی کمک فراوان کے و اسرائیلی جارحیت ءِ تورفنگ کن تینا اہم کڑد ءِ ہم ادا کے۔ اوپارے کہ فلسطین نا آزاد ریاست نا وڑاٹ حق ءِ امنا کننگے و اسرائیلی فوجی تینا غیرکانودی کوزہ ءِ چٹفر۔