کوئٹہ۔ 09 اکتوبر (اے پی پی)نگران صوبائی وزیر جان جوڑی ڈاکٹر امیر محمد خان جوگیزئی ڈی ایچ کیو ہسپتال دکی نا دورہ ءِ کرے۔ داوخت آ ڈپٹی کمشنر کیپٹن (ر) فیاض علی، ڈی ایچ او ڈاکٹر رفیق احمد بلوچ، ڈپٹی ڈی ایچ او ڈاکٹر نصیب اللہ لونی، ایم ایس ڈاکٹر جوہر خان شادوزئی و ایلوفک ہم ساڑی ئسر۔ اوشعبہ حادثات تون اوار چائلڈ وارڈ و ڈی ایچ او آفس تون اوار ایلو بشخ آتا دورہ ءِ کرے۔ ڈی ایچ او دکی ڈاکٹر رفیق بلوچ اودے مچ آ ضلع ٹی جان جوڑی نا آسراتی تون اوار سول ہسپتال دکی ٹی دوائی و پین وسیلہ مفننگ نا سوب آن اودے سرجمی اٹ حوال تس۔ داوخت آ نگران صوبائی وزیر جان جوڑی ڈاکٹر امیر محمد خان جوگیزئی پارے کہ مسہ تُو انا مد اٹی نگران حکومت جان جوڑی نا بابت تاریخی کاریم کرینے۔ ہراٹی غٹ آن بھلا کاریم 22 لکھ خاہوت ءِ جان جوڑی کارڈ انا فراوانی ءِ۔ جان جوڑی کارڈ اکن داسہ پین جاگہ اس ہِننگ نا ضرورت مفک۔ نما جیب اٹی ساڑی نما شناختی کارڈ ہی جان جوڑی کارڈمریک ہرا 25 اکتوبرآن کاریمی مریک۔ اوپارے کہ داکاریم کن ہفت ارب روپئی ریلیز کننگانے۔ و جان جوڑی کارڈ آدرمان کن مچ آ ملک انا دُوانزدہ سد ہسپتال آتیٹی جان جوڑی کارڈ انا کمک اٹ درمان نا آسراتی دوئی مریک ۔ اوپارے کہ ایلو صوبہ غاتیٹی فی مریض کن دہ لکھ روپئی اسکان نا درمان جان جوڑی کارڈ انا کمک اٹ مریک ولے نن صوبہ بلوچستان نا الس نا حالیت ءِ مون آ تخسا زر ءِ ودفسا دُوانزدہ لکھ روپئی فی مریض نا درمان کن تخانن۔ اوپارے کہ ٹراما سینٹر کوئٹہ ءِ آسراتی تیان شپ کننگانے۔ لورالائی ہسپتال اٹی ارٹ میکو آپریشن تھیٹر ءِ ہم فنکشنل کرینے۔ اوپارے کہ ہر ضلع ٹی اسہ کمیٹی ڈپٹی کمشنر نا چاروکی ٹی جوڑ کننگک ہراٹی ڈی ایچ او و ایم ایس تون اوار ایلوفتے اوار کننگک و دا کمیٹی ماہانہ میٹنگ کرسا منٹس تیار کیک و نن ہمومنٹس آتے ہرسا کمیٹی نا ہرا ڈیمانڈمریک اوفتے پورو کننگ نا کوشست کینہ۔ اوپارے کہ ای بلوچستان نا الس نا حالیت آن جوانی اٹ بلد اُٹ۔ کوشست کننگ اُن کہ جان جوڑی نا گچین آسراتی اوفتے درگہ غا فراوان کننگ کین۔
