کوئٹہ۔ 09 اکتوبر (اے پی پی) نگران صوبائی وزیر تعلیم پروفیسر ڈاکٹر قادر بلوچ تون یونیسیف پاکستان نا نمائندہ عبداللہ فادل تینا ڈل اتون اوار اونا آفس اٹی اوڑدہی کرے اوڑدہی ٹی یونیسیف پاکستان نا کنڈآن نگران صوبائی وزیر تعلیم پروفیسر ڈاکٹر قادر بلوچ ءِ صوبہ ٹی تعلیم نا بشخ اٹی برجا ڈٹ آتیا سرجم حوال تننگا داوخت آ نگران صوبائی وزیر تعلیم پروفیسر ڈاکٹر قادر بلوچ پارے کہ صوبہ ٹی تعلیم نا ویل آتیا ننا سخت نظر ءِ صوبہ ٹی تعلیم نا بشخ اٹی گچینی اتنگ کن اولیکو دے آن ننا کوشست برجاءِ اوپارے کہ صوبہ ٹی تعلیم نا بشخ اٹی گچینی اتنگ کن یونیسیف نا کوشست قابل ذکر ءِ صوبہ نا مر مر انگا پسماندہ علاقہ غاتیٹی صوبائی حکومت و یونیسیف نا تین پہ تینی شریداری اٹ تعلیم نا ویل آتا ایسر کننگ اٹ خاطر خواہ کمک رسینگانے ، یونیسیف نا رپورٹ نا رداٹ صوبہ ٹی 4000 اسکول ہندن ءُ کہ ہرافتے ٹی واش روم نا آسراتی میسر اف دافتے ٹی گرلز اسکول نا کچ بے کچ زیات ءِ ہنداوڑ 6700 اسکول ہند ن ءُ کہ ہرافتے ٹی بیرہ اسہ استاد اس تعینات ءِ ہرافتا منفی اثرصوبہ نا تعلیم آ تشویشناک حداسکان تمنگ ءِ ، نگران صوبائی وزیر تعلیم پروفیسر ڈاکٹر قادر بلوچ پارے کہ صوبہ ٹی تعلیم نا بشخ اٹی یونیسیف اسہ اہم ڈونرایجنٹ اسے ہرانا کمک اٹ صوبہ ٹی تعلیم نا بشخ اٹی بھاز کاریم مننگ ءِ صوبہ ٹی تعلیم نا بشخ اٹی یونیسیف داوخت آ 2400 اسکول آتےہُننگ ءِ محکمہ تعلیم و یونیسیف اٹ پین گچین کوآرڈی نیشن مننگ آن پد دااسکول آتا کچ 3600 اسکان اتنگ مریک۔
