اسلام آباد۔ 06 اکتوبر (اے پی پی) صدر مملکت ڈاکٹر عارف علوی پاکستان و بحرین نا نیام اٹ پین سوگو زرگزرانی، تعلیمی و دودوربیدہ ئی رابطہ غاتے قائم کننگ نا گرج آ زور شاغسا پارینے کہ پاکستان بحرین تون ایلمی تعلقداری تے خاص اہمیت ایتک۔ جمعہ نادے آایوان صدر نا پریس ونگ آن جاری بیان نا رداٹ صدر مملکت داخیال آتا درشانی ءِ گورنر ہاؤس کراچی ٹی بحرین کن پاکستان نا پندار سفیر ثاقب رؤف تون اوڑدہی ٹی گپ وتران کرسا کرے۔ صدر مملکت پارے کہ پاکستانی سفارت خانہ پاکستان آن کسبکار لیبرفورس انا تبادلہ و درملکی زرراہی تس ءِ ودفنگ کن کاریم کے۔ صدر پارے کہ پاکستان آن قابل قدر مصنوعات آتا برآمد آتے ودفنگ نا گرج ءِ۔ اوپارے کہ پندار سفیر بحرین تون ہڑتوم آ کنڈآتا واپار و افرادی قوت نا برآمد آ چکار کے۔ صدر مملکت پارے کہ چندی راجی و اقتصادی بشخ خاص وڑاٹ انفارمیشن ٹیکنالوجی و مصنوعی ذہانت اٹ کسبکار افرادی قوت نا مانگ ودنگ ءِ۔ ڈاکٹر عارف علوی پندار سفیر ءِ مبارکبادی ترسا اوڑکن بحرین اٹ سرسہبی کن نیک است خواہی نا درشانی ءِ کرے۔
