بلوچستان نا غٹ مر انگا علاقہ غاتیٹی بنداوی آسراتی تا فراوانی کن کوشست کننگ اُن، میر علی مردان خان ڈومکی

کوئٹہ۔ 06 اکتوبر (اے پی پی) نگران وزیراعلیٰ بلوچستان میر علی مردان خان ڈومکی پارینے کہ بلوچستان نا غٹ مر انگا علاقہ غاتیٹی مواصلات نا ذریعہ، جان جوڑی ، تعلیم و کنوئی آ ساف دیر اتون بنداوی آسراتی تا فراوانی کن کوشست کننگ اُن ننا کوشست ءِ کہ  ملوک آ وخت اٹی الس نا آسودہی کن ہندن ءُ عمل نا قابل گام گیج کننگے ہرافتا بھرم الس اسکان سرمرے۔ داخیال آتا درشانی ءِ او جمعہ نادے آ داڑے السی مچی آن تران کرسا کرے داوخت آ الس نا اسہ بھلو کچ اس نگران وزیراعلیٰ بلوچستان میر علی مردان خان ڈومکی ءِ تینا ویل آتا بابت معلومدار کریرودرخواست آتے پیش کریر۔ نگران صوبائی وزیر میردانش لانگو، آصف الرحمان دمڑ ئسک ہم نگران وزیراعلیٰ بلوچستان تون اوار ئسر۔ اوپارے کہ لہڑی ٹی بنداوی آسراتی تا فراوانی نا ہمو ڈٹ ہرا پبلک سیکٹر ڈویلپمنٹ پروگرام نا رداٹ منظور مروک ءُ و فنڈ آتا جاری مفننگ نا سوب آن تعطل نا گواچی ءُ اوفتیا بلاتاخیر کاریم نا بناءِ کننگے فنڈآتا ریلیز ءِ صوبائی حکومت پک کیک ۔ داکان مست او گورنمنٹ بوائز ہائی اسکول نا دورہ ءِ کرے و اسکول نا ماڑی نا خستہ حالی آ ترندی نا درشانی ءِ کرے و پی ایس ڈی پی نا رداٹ منظور مروک اسکیم آتیٹی تعلیمی ادارہ غاتاتفنگ وجوڑجاڑ ءِ پورو کننگ نا پارت کرے اوپارے کہ تعلیمی بشخ اکن پی ایس ڈی پی نا رداٹ جتا فنڈ آتا جاری کننگ ءِ پک کننگک اوپارت کرے کہ بوائز ہائی اسکول اٹ سائنس و کمپیوٹر لیب اٹ المی گڑا فراوان کرسا فعال کننگے۔ اولہڑی آرایچ سی نا ہم دورہ  ءِ کرے و رورل ہیلتھ سینٹر اٹ یونیسیف نا کمک  اٹ پورو مروک  آ جوڑ جاڑی و تزئین نا ڈٹ انا بناءِ کرے ۔ داوخت آ سیکرٹری  جان جوڑی بلوچستان اسفند یارکاکڑ و ڈائریکٹر جنرل جان جوڑی نورقاضی نگران وزیراعلیٰ بلوچستان ءِ لہڑی ٹی دستیاب جان جوڑی نا آسراتی تا بابت حوال تسر و پاریر کہ آرایچ سی لہڑی ٹی المی طبی مشینری و دوائی فراوان کننگانے۔