اسلام آباد۔ 06 اکتوبر (اے پی پی) چیئرمین سینیٹ محمد صادق سنجرانی پارینے کہ موسمیاتی بدلی نا اثرآتے مون آ تخسا دنیا نا ملک آتے چاگڑد دوست بجلی ودی کننگ نا کنڈآ چکار کننگ نا گرج ءِ۔ داخیال آتا درشانی ءِ او جمعہ نادے آ پاکستان اٹی اٹلی نا سفیر اینڈریاس فیراریز تون اوڑدہی ٹی کرے۔ اوڑدہی ٹی تین پہ تینی است خواہی نا امور تون اوار جم علاقائی حالیت آتیا گپ وتران و توانائی نا سرحال آ سرجمی اٹ شرہ مس۔ چیئرمین سینیٹ پارے کہ ہڑتوم آ ملک آتا نیام اٹ خوشگوار تعلقداری جوڑ ءِ، پاکستان اٹلی تون تعلقداری تے خاص اہمیت ایتک، پاکستان ءِ توانائی نا تنکی مون تروک ءِ ہرانا مون ءِ توننگ کن دنیا نا چاہندار آتا کمکاری المی ءِ بجلی نا روایتی ذریعہ غان اینک کرسا گیگ بدل ذریعہ اٹ بجلی ودی کننگ نا وارخواہی پٹنگے۔ اوپارے کہ پاکستان اٹ شمسی توانائی و تہوآن بجلی ودی کننگ نا گیشتر وارخواہی ارے، اٹلی ٹی توانائی نا چاہندار آک پاکستان اٹ گیگ بدل بجلی ودی کننگ اٹ کمک کننگ کیرہ، موسمیاتی بدلی نا اثرآتے مون آ تخسا دنیا نا ملک آتے چاگڑد دوست بجلی ودی کننگ نا کنڈآ چکار کننگ نا گرج ءِ اطالوی کمپنیک پاکستان اٹ ساڑی زرکاری و کاروباری وارخواہی تیان بایدے فائدہ ہرفر۔ پاکستان و خاص وڑاٹ بلوچستان اٹ معدنیات نا بشخ اٹی ہم زرکاری نا وارخواہی ساڑی ءِ ہراڑآن اٹلی نا زرکارآک ہم فائدہ ہرفنگ کیرہ، اٹلی تون اقتصادی کمکاری تون اوار چندی بشخ آتیٹی تعلقداری تے گچین کننگ نا خواہندار ءِ۔ اطالوی سفیر علاقائی امن و سوگوی کن پاکستان نا کڑد انا ستاءِ کرسا پارینے کہ پاکستان تون سفارتی کمکاری ٹی پین گچینی کن تینا پبی کڑد ءِ ادا کیوہ۔ اوڑدہی ٹی ہڑتوم آ کنڈآتا واپاری و اقتصادی تعلقداری تے پین ودفنگ کن رابطہ غاتے پین مون آ دننگ آ ہم امنا کننگا۔
