فیصل آباد۔ 06 اکتوبر (اے پی پی) سینیٹ نا اسٹینڈنگ کمیٹی آن فنانس اینڈ ریونیو نا چیئرمین سینیٹر سلیم مانڈوی والا پارینے کہ پاکستان ءِ زرگزرانی وڑاٹ سوگو کننگ کن میثاق معیشت المی ءِ، زرگزرانی پالیسی تا تسلسل و نجی بشخ ءِ پالیسی سازی ٹی شریک کننگ آ غٹ سیاسی جماعت آتا اتفاق ءِ۔ فیصل آباد چیمبرآف کامرس اینڈ انڈسٹری نا عہدیدار و باسک آتیان تران کرسا اومیثاق معیشت ءِ پاکستان کن المی گوندسا پارینے کہ اودے یقین ءِ کہ آخبت نا حکومت ہم دااہمیت ءِ سمجھک و غٹ جماعت آک داڑآ دستخط کیرہ۔ اوپارے کہ پاکستان اٹ اولیکو ار مسنے کہ آئی ایم ایف غٹ سیاسی جماعت آتیان انڈرٹیکنگ ہلکنے کہ او ہندا پروگرام ءِ چلیفرہ۔ اوپارے کہ داٹی میثاق معیشت نا شق ءِ ہم شاغنگ مریک۔ اوپاکستان نا زرگزرانی بدحالی ءِآئی ایم ایف تون گنڈنگ نا تردید ءِ کرے و پارے کہ دا ادارہ بیرہ دا خواہک کہ پاکستان اٹی مالی ڈسپلن اس جوڑ کننگے۔ اوپارے کہ ہراتم اسکان نن دا ڈسپلن ءِ جوڑ کپنہ زرگزران سہی مفک۔ اوپارے کہ امن و ایمنی نا بحالی کن زرگزران نا بحالی المی ءِ۔ پاکستان اٹ زرگزرانی بدحالی نا سوب آن امن و ایمنی نا حالیت خراب مننگ اٹی ءِ۔ مخلوق نا بھلو کچ اس بے روزگار ءِ۔ کبینی 30،40 درسد اسکان سرمسنے وخت اس کہ بزنس مین تنخواہ تے ادا کپننگ ءُ۔ اوپارے کہ ہراملک اٹی شونہالی مریک ہموڑے ڈوہ انا کچ ہم نسبتا کم مریک۔ اوپارے کہ چیمبرآتے تینا تینا شار تا شونداری کن ہم تینا کڑد ءِ ادا کروئی مریک۔ اولسبیلہ چیمبر نا بابت پارے کہ او ہموڑے لسبیلہ ویلفیئر کمیٹی اس جوڑ کرے ہرا دامون ایمون نا خلق آتے بجلی آن بیدس کنوئی آ دیر انا آسراتی ہم تس۔ اوپارے کہ آسودہی سیکٹراٹی کاریم کننگ آن بزنس کمیونٹی نا بارواٹی دا تاثر زائل مریک کہ اوناکاریم بیرہ منافع کننگ ءِ۔ ایل سی ءِ ملپننگ نا بارواٹی سلیم مانڈوی والا پارے کہ دابھاز بھلو ویل اسے۔ ڈالر ناکاختی نا سوب آن اسٹیٹ بینک مسہ سیکٹر نا ایل سی ءِ اولیتی بنداو تیا ملنگ نا موکل تس ہرافتے ٹی تیل و دفاع نا بشخ آک اوار ئسر۔
