اسلام آباد۔ 06 اکتوبر (اے پی پی) دے ٹکی ایشیانا ملک آتون پاکستان نا واپاری نسخان اٹی برجامالی سال اٹی کمتی ریکارڈ کننگانے، برجامالی سال اٹی دے ٹکی ایشیاء نا ملک آتے پاکستانی برآمد آتیٹی سالانہ بنداوتیا 3.25درسد نا نمو وخت اس کہ دا ملک آتیان درآمد آتیٹی 21.32 درسد نا کمتی ریکارڈ کننگانے۔ اسٹیٹ بینک انا کنڈآن دا بابت جاری کروک حساب وکتاب نا رداٹ برجامالی سال انا اولیکو اِرا تُو اٹی چین ، جاپان ، سویلی کوریا و دے ٹکی ایشیانا ایلو ملک آتے برآمد آتیان ملک ءِ 469.55 ملین ڈالر نا زرمبادلہ دوئی مس ہرا تدوک آ مالی سال انا ہندا مد انا مقابلہ ٹی 3.25 درسد زیات ءُ تدوک آ مالی سال انا ہند امد اٹی دے ٹکی ایشیاء نا ملک آتے برآمد آتیان ملک ءِ 454.76 ملین ڈالر نا زرمبادلہ دوئی مسوسس۔ اگست اٹ دے ٹکی ایشیانا ملک آتے پاکستانی برآمد آتا کچ 262.48 ملین ڈالر ریکارڈ کننگا ہرا جولائی ٹی 207.07 ملین ڈالر و تدوک آ سال اگست اٹی 233.67 ملین ڈالر ئسر، مالی سال 2023 ٹی دے ٹکی ایشیانا ملک آتے برآمد آتیان ملک ءِ 2.740 ارب ڈالر نا زرمبادلہ دوئی مسوسس۔ حساب وکتاب نا رداٹ برجامالی سال انا اولیکواِرا تو اٹی دے ٹکی ایشیانا ملک آتیان درآمد آتیٹی سالانہ بنداوتیا 21.32 درسد نا کمتی ریکارڈ کننگانے۔ مالی سال انا اولیکو اِراتُو اٹی دے ٹکی ایشیا نا ملک آتیان درآمد آتیا 2.34 ارب ڈالر نا زرمبادلہ خڑچ مس ہرا تدوک آ مالی سال انا ہندا مدا ٹی 2.84ارب ڈالر ئسر، اگست اٹ دے ٹکی ایشیانا ملک آتیان 1.123 ارب ڈالرنا درآمد ریکارڈ کننگا ہرا جولائی ٹی 1.220 ارب ڈالر و تدوک آ سال اگست اٹی 1.486 ارب ڈالر ئسر۔
