کوئٹہ۔ 06 اکتوبر (ا ے پی پی) پاکستان مسلم لیگ (ن) بلوچستان نا راہشون چوہدری بابر وجاوید احمد خان ئسک پارینو کہ پارٹی قائد میاں محمد نواز شریف نا کماشی ٹی مہالو ہم ملک ءِ بجلی نا بدترین تنکی و دہشت گردی آن چٹفنگاسس و آخبت ہم قوم ءِ غٹ مشکل آتیان چٹفنہ۔ لس گچین کاری تیٹی مسلم لیگ (ن) بلوچستان تون اوار ہر چار آ صوبہ غاتیٹی پبی سرسہبی دوئی کیک پارٹی نا کارندہ غاک 19 اکتوبر آ کوئٹہ غان پارٹی قائد نا بخیر کننگ کن صوبائی سرکڑدہ غاتا کماشی ٹی روانہ مریرہ و انشاء اللہ میاں محمد نواز شریف نا پاکستان آ سرمننگ آفقید المثل بخیر کینہ۔ داہیت ءِ اوفک جمعہ نادے آ ریلوے کالونی و بروری روڈ انا کارندہ غاتا دیوان آن تران کرسا پاریر۔ اوفک پاریر کہ پاکستان مسلم لیگ (ن) السی طاقت آ یخین تخک و انشاء اللہ بروک آ لس گچین کاری تیٹی پارٹی الس ءِ واک اٹ برسراقتدار برسا ملک و قوم ءِ شونہالی و شونداری نا کنڈآ دیک مسلم لیگ (ن) لس گچین کاری تیکن تیار ءِ و کارندہ غاک پارٹی نا قائد میاں محمد نواز شریف نا کلہو و پارٹی منشور ءِ ہراُراغا سرکیر و الس تون خڑکی رابطہ تخر۔ اوفک پاریر کہ پارٹی قائد و مسکوہی وزیراعظم میاں محمد نواز شریف الس نا است آتیٹی رہینگک ہرادےکشفنگ مفک ہراتم آن میاں نواز شریف نا وطن آ پدی بننگ نا پڑو مسنے کارندہ و الس اٹ خوشی اس تالان مسنے۔ اوفک پاریر کہ مسلم لیگ (ن) بلوچستان نا کارندہ غاک 19 اکتوبر آ پارٹی قائد ءِ بخیر کننگ کن لاہور آ روانہ مریرہ و 21 اکتوبر آ پاکستان آ سرمننگ آ میاں محمد نواز شریف ءِ جم و جوش اٹ بخیرکننگک و مینارپاکستان نا جلسہ پوسکن ءُ تاریخ اس نوشتہ کیک۔
