کوئٹہ۔ 06 اکتوبر (ا ے پی پی)پاکستان پیپلزپارٹی زالبول ونگ بلوچستان نا صدر و مسکوہی صوبائی وزیر غزالہ گولہ ، جنرل سیکرٹری زرینہ زہری ئسک پارینو کہ پاکستان پیپلزپارٹی گچین کاری تیکن پورو تیار ءِ گچین مروک آ السی حکومت ملک ءِ تنکی و مشکل آتیان کشنگ کیک، پاکستان نا الس خواہک کہ چیئرمین پیپلزپارٹی بلاول بھٹو زرداری پاکستان نا بھاگ دوڑ ءِ سنبھالے انتئے کہ بلاول بھٹو پاکستان الس نا اومیت و تغ تے پورو کننگ نالائخی و قابلیت تخک ہرانا تربیت ہی سیاسی چاگڑد اٹی مسنے۔ چیئرمین پیپلزپارٹی بلاول بھٹو ہراوڑ پاکستانی سیاست ءِ خرک و خوڑتی اٹ خنانے شاید پین کس اس خنوئے ہنداسوب ءِ کہ ہرا بلاول بھٹو پاکستانی الس نا سوچ و اومیت آتا وت جوڑ مسنے۔ داہیت ءِ اوفک جمعہ نادے آاوڑدہی کروک آ زالبول آتا اسہ ڈل اسے تون گپ وتران کرسا پاریر۔ اوفک پاریر کہ پاکستان داوخت آ بھاز انگا مشکل وتنکی تیٹی تموک ءِ ملک ءِ ساڑی مشکل و تنکی تیان کشنگ نا اسٹ انگا ایسر چیئرمین پیپلزپارٹی بلاول بھٹو زرداری ءِ۔ اوفک پاریر کہ پاکستان پیپلزپارٹی نا دا خواست ءِ کہ لس گچین کاری تے تینا تخوک آ وخت و آئینی مد اٹی کرفنگے وخت آ گچین کاری آن ساڑی آ گھمبیر حالیت و بے یقینی نا کیفیت آن پیش تمنگ مریک۔ اوفک پاریر کہ اسہ رپورٹ اسے نا رداٹ ملک اٹی کبینی نا کچ اٹی 26 درسد آن زیات ودکی مسنے ہرانیزگار مخلوق نا مشکل آتے پین ودفینےپاکستان سیاست نا تاریخ ءِ اگہ ہُننگے داوڑنا حالیت وخت اس ہم ودی متنے ہرا ساڑی آ دور اٹی چلینگ انگ ءِ ہراڑے کبینی تدوک آ مچ آریکارڈ ءِ پرغانے، نت، بورہ، دال، سی ،پال ، سُو، سوزی و ایلو کنوئی آ گڑاک مخلوق ناہلنگ نا وس آن ہِنسا کننگ ءُ ، نگران حکومت اگہ مسہ تُو ٹی گچین کاری کرفتو تو حالیت آک پین خراب مننگ نا گڑتی ءِ۔ اوفک پاریر کہ پاکستان پیپلزپارٹی لس گچین کاری تیکن تیار ءِ الیکشن کمیشن دمدستی وڑاٹ لس گچین کاری تا تاریخ نا پڑو ءِ کے تانکہ الس تینا ووٹ آتا کمک اٹ تینا نمائندہ غاتے گچین کرسا ایوان تیا گدریفنگ کے ہراڑے گچین مروک آ نمائندہ غاک الس نا سہی وڑاٹ خذمت ءِ کننگ کیر۔ اوفک پاریر کہ انشاء اللہ بروک آ وخت پاکستان پیپلزپارٹی نا ءِ پاکستان پیپلزپارٹی نا دور اقتدار اٹ مدام پاکستان شونداری نا مزل آتے طے کرے و الس ءِ آسراتی ملا، پاکستانی الس چاہک کہ پیپلزپارٹی پاکستان نا ویل آتا ایسر و شونداری نا ضمانت ءِ ، لس گچین کاری تیٹی السی واک اٹ حکومت جوڑ کینہ و چیئرمین پیپلزپارٹی بلاول بھٹو پاکستان نا وزیراعظم گچین مرسا ملک ءِ شونداری نا کنڈآ دیک۔
