نگران وزیراعظم انوارالحق کاکڑ نا وزیراعظم آزاد کشمیر چوہدری انوارالحق تون اوڑدہی ٹی گپ وتران

اسلام آباد۔ 05 اکتوبر (اے پی پی) نگران وزیراعظم انوارالحق کاکڑ پارینے کہ پاکستان تینا کشمیری ایڑھ ایلم تا سیاسی، اخلاقی و سفارتی کمکاری ءِ برجاتخک، کشمیر نا ویل تقسیم ہند نا نیمہ گڈلو ایجنڈا ءِ۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او آزاد کشمیر نا وزیراعظم چوہدری انوارالحق تون گپ وتران کرسا کرے ہرا پنچ شنبے نادے آ داڑے اوڑتون اوڑدہی کرے۔ اوڑدہی ٹی وزیر اعظم آزاد کشمیر نگران وزیراعظم انوارالحق کاکڑ ءِ اقوام متحدہ جنرل اسمبلی ٹی کشمیری تیکن توار بڑز کننگ آ خراج تحسین پیش کرے و پارے کہ بھارت نا غیرکانودی کوزہ ٹی جموں و کشمیر اٹی کروک آ ظلم ءِ دنیا نا مون آ بے نقاب کننگ آ نن کشمیری نما منت وار اُن۔ نگران وزیراعظم انوارالحق کاکڑ پارے کہ پاکستان تینا کشمیری ایڑھ وایلم تا حق خودارادیت نا دوئی کننگ نا جہد اٹی ہر وڑاٹ اوفتے تون تفوک ءِ۔ پاکستان تینا کشمیری ایڑھ ایلم تا سیاسی، اخلاقی و سفارتی کمکاری ءِ برجاتخک۔ کشمیر نا ویل تقسیم ہند نا نیم گڈلو ایجنڈاءِ۔ اوپارے کہ ہراتم اسکان کشمیر نا ویل انا ایسری اقوام متحدہ سیکورٹی کونسل نا قرارداد آتا رداٹ کشمیری تا است خواہی نا رداٹ مفک، نن کشمیری تا جہد اٹی اوفتے تون تفوک اُن۔