فلم و راگ  ملک اسے نا جہانی کہول آ تشخص ءِ گچین کننگ اٹ اہم ءُ کڑد اس ادا کننگ کیرہ، پاکستان و ترکیہ نا نیام اٹ  میڈیا، راگ ، فلم آتون اوار چندی بشخ آتیٹی کمکاری ءِ پین ودفنگ نا گرج ءِ، مرتضیٰ سولنگی

اسلام آباد۔ 05 اکتوبر (اے پی پی) نگران بنجائی وزیر حوالکاری و شینکاری مرتضیٰ سولنگی پاکستان و ترکیہ نا نیام اٹ میڈیا، راگ ، فلم آتون اوار چندی بشخ آتیٹی کمکاری ءِ پین ودفنگ نا گرج آ زور شاغسا پارینے کہ فلم و راگ ملک اسے نا جہانی کہول آ تشخص ءِ گچین کننگ اٹ اہم ءُ کڑد اس ادا کننگ کیرہ، پاکستان ترکیہ تون تینا تعلقداری تے قدر انا نظر اٹ ہرک ، پاکستان و ترکیہ مدام مشکل وخت اٹی اسہ ایلو تون  تفینو۔ داہیت ءِ او پنچ شنبے نادے آ داڑے اوڑدہی کن بروک پاکستان اٹ تعینات ترک سفیر مہمت پچاجی تون گپ وتران کرسا پارے۔ اوڑدہی ٹی تاریخی و برادرانہ تعلقداری تون اوار چندی بشخ آتیٹی کمکاری نا بابت امور آ گپ و تران مس۔ ہڑتوم آ ملک آتا نیام اٹ اقتصادی ، واپاری ، دودوربیدہ ئی ، سیل و سوات و السی کہول آ رابطہ غاتون اوار چندی بشخ آتیٹی ہڑتوم آکنڈآتا کمکاری ءِ مون آ دننگ آ امنا مس۔ نگران بنجائی وزیر حوالکاری ترکیہ ٹی ساڑی آ بمب دھماکہ نا ترند انگا لوز آتیٹی مذمت ءِ کرسا پارے کہ دہشت گردی نا دڑد ءِ نن محسوس کرینن، ترکیہ ہم دا دڑد انا گواچی ءِ، نن سوگو ءُ ملک اسے اُن، دہشت گردی نا واقعہ غاک ننے بطور قوم نزور کننگ کپسہ۔ اوڑدہی ٹی پاکستان و ترکیہ نا نیام اٹ میڈیا، راگ فلم آتا بشخ آتیٹی کمکاری ءِ پین ودفنگ نا گرج آ زور شاغنگا۔ نگران بنجائی وزیر حوالکاری پارے کہ فلم و راگ ملک اسے نا جہانی کہول آ تشخص ءِ گچین کننگ اٹ اہم ءُ کڑد اس ادا کننگ کیرہ، ترک راگ آک پاکستان اٹ بھاز پنی ءُ، ترکیہ تون اواری اٹ فلم جوڑ کننگ خوانہ۔ اوپارے کہ ترکیہ نا فلم ساز پاکستان اٹ فلم انڈسٹری نا بشخ اٹی خراج آسودہی تیان فائدہ ہرفنگ کیرہ، پاکستان نا قطبی علاقہ غاک قدرتی حسن آن شپ ءُ، ترکیہ نا فلم ساز آک دا زیباغا سیل و سواتی علاقہ غاتیٹی فلم بندی کننگ کیرہ۔ اوپارے کہ ہڑتوم آ ملک آتا نیام اٹ میڈیا نا بشخ آتیٹی کمکاری وخت انا گرج ءِ۔ اوپارے کہ پاکستان و ترکیہ اواری اٹ تینا دودوربیدہ ءِ مون آ دیر، دارداٹ پاک چائنا سینٹر اٹی اسیجائی فلم ہم نشان تننگ مریک۔ داوخت آ گپ وتران کرسا ترک سفیر پارے کہ پاکستان و ترکیہ نا نیام اٹ میڈیا تون اوار زند انا ہر بشخ اٹی کمکاری ساڑی ءِ۔ نن خوانہ کہ پاکستان اٹ ترک فلم آتے اتین برین۔ اوپارے کہ جمہوریہ ترکیہ تینا 100 می سال دے ءِ اڈتننگ ءِ، نن خوانہ کہ پاکستان تون اواری اٹ دا دود آتے یات گار کین۔ ترک سفیر علاقائی کمکاری ٹی نگران بنجائی وزیر حوالکاری نا است خواہی نا ہم ستاءِ کرے۔