اسلام آباد۔ 05 اکتوبر (اے پی پی) وزیر مملکت سیل و سوات وصی شاہ پارینے کہ وزارت سیل و سوات الس نا آسراتی کن زوت ٹورازم ایپ اس لانچ کیک تانکہ سیل وسواتی ہند آتا بابت ون کلک آ معلومداری دوئی کننگ مرے۔ دا ایپ اٹ ریسٹورنٹ، ہوٹل، ٹرانسپورٹ، سفری آسراتی، کلچر، تفریحی و تاریخی ہند آتا بابت غٹ معلومداری تے اوار کننگک و داٹی دا ہیت ءِ پک کننگک کہ داایپ ءِ آخبتی بنداوتیا اپڈیٹ کرسا کننگے۔ اوخاص وڑاٹ پارے کہ ایپ انا کمک اٹ سیل و سواتی تے ہموغٹ معلومداری تے فراوان کننگک ہرافتا بارواٹ اوچاہنگ خوارہ۔ داخیال آتا درشانی ءِ او صحافی تتون گپ وتران کرساکرے۔ اوپارے کہ پاکستان بروک آ سیل و سواتی تے زوت اسہ سرکاری ایپلی کیشن اس ملک ہرا مستندمعلومداری و محکمہ سیل و سوات اسکان رسینگ فراوان کیک۔ اوپارے کہ کلچر کاروان نا وخت آ ٹیکسلاٹی پیشن نا ملک آن بروک آ سیل و سواتی تے خنسابھاز خوشی مس و او السی حلقہ غاتیٹی دانا بے پناہ پذیرائی ٹی الس ومیڈیا نا بھاز منت وار ءُ۔ صحافی تتون گپ وتران کرسا وزیر مملکت سیل و سوات وصی شاہ پارے کہ بطور وزیر مملکت سیل و سوات ٹورازم ءِ پروموٹ کننگ وپاکستان ءِ سیل وسواتی تا جنت جوڑ کننگ کن عملی گام گیج کننگ اٹی اُٹ ہرانا بھرمک زوت سیل وسواتی تسکان رسینگرہ۔
