لاہور۔ 05 اکتوبر (اے پی پی) مسکوہی وزیراعظم شہباز شریف تون پنچ شنبے نادے آ لاہور وپنجاب ٹریڈرز ایسوسی ایشنز نا عہدیدار و نمائندہ غاک داڑے اوڑدہی کریر۔ اوڑدہی ٹی ملک انا زرگزرانی حالیت آتیا سرجمی اٹ گپ و تران کرینو۔ داوخت آ مسکوہی وزیراعلیٰ پنجاب حمزہ شہباز شریف تون اوار ایلوپارٹی راہشونک ہم ساڑی ئسر۔ پوریاگرآک شہباز شریف نا میثاق معیشت نا سلاہ نا پبی تائیدو مخ تفی ءِ کریر۔ پوریاگرآک ملک ءِ ڈیفالٹ آن بچفنگ آ بطور وزیراعظم شہباز شریف ءِ خراج تحسین پیش کریر۔ شہباز شریف پوریاگرآتون گپ وتران کرسا پارے کہ نواز شریف 21 اکتوبر آ وطن آ پدی برسا پاکستان ءِ مون تروک زرگزرانی مشکل آتا ایسری نا ایجنڈا اس ایتک ، نواز شریف تینا ہر دور اٹی ملک ءِ تنکی تیان کشانو۔ اوپارے کہ قوم نا سیوت، سیاسی تسلسل و سہی پالیسی تیان زرگزرانی خودانحصاری و شونداری ءِ پک کننگ مریک۔ اوپارے کہ مسلم لیگ (ن) مدام تینا سیات آ ریاست ءِ اولیت تسنے، نن تینا شانزدہ تُو انا حکومت اٹی سیاست نا قربانی ترسا ریاست ءِ بچفین، اگہ نن اقتدار ءِ سنبھالتونہ تو خدانخواستہ ملک ڈیفالٹ مسکہ، نن دے و نن خواری کرسا پاکستان ءِ ڈیفالٹ مننگ آن بچفین۔
