اسلام آباد۔ 04 اکتوبر (اے پی پی) مسکوہی سیکرٹری خارجہ و ڈائریکٹر جنرل انسٹی ٹیوٹ آف سٹریٹجک سٹڈیز اسلام آباد (آئی ایس ایس آئی) سہیل محمود پارینے کہ روایتی سیکورٹی خدشہ غاک بھاز اہم ءُ ولے غیرروایتی سیکورٹی خطرہ و چیلنج آتیا زور شاغنگ وخت انا خواست ءِ، موسمیاتی بدلی پاکستان کن انسانی سلامتی نا اسہ اہم ءُ ویل اسے و اودے بے کچ سنجیدگی اٹ ایسر کننگے۔ داخیال آتا درشانی ءِ او داڑے انسٹی ٹیوٹ آف سٹریٹجک سٹڈیز اٹی سینٹر فار سٹریٹجک پرسپیکٹیو اٹی ’’ہیومن سیکورٹی تھروڈیویلپمنٹ‘‘ آ اسہ خصوصی رپورٹ اس جاری کننگ نا وخت آ تران کرسا کرے۔ دود انا مہمان خاص چیئرمین نیشنل ڈیزاسٹر مینجمنٹ اتھارٹی (این ڈی ایم اے ) لیفٹیننٹ جنرل انعام حیدر ملک ئس۔ سہیل محمود پارے کہ پاکستان نا قومی سلامتی پالیسی جوان قومی سلامتی نا فریم ورک انا بشخ انا وڑاٹ انسانی سلامتی ءِ بجاوڑاٹ اولیت تسنے، دا چندی سیکورٹی چیلنج آتے امنا کرینے ہرافک پائیدار شونداری نا کنڈآ ملک انا پیش رفت ءِ تورینو۔ اوورناچین ءِ قوم اکن اسہ نہادی میرات اس گوندا و انسانی رکھ اٹ ودکی کن اونا مہارت نا نشوونما ءِ ودفنگ نا گرج ءِ تالان کرے۔ سہیل محمود بشخ ہلوک آتا منت واری ءِ ہرفسا پارے کہ خصوصی رپورٹ انسانی سلامتی نا چیلنج آتا مچ آ رینج آن گچین وڑاٹ جم و مربوط ورڑاٹ مون تننگ کن اسہ جوان نقطہ نظر نا گرج آ زور شاغک و دا غٹ تعلقدار بندغ آتیکن روڈ میپ نا وڑاٹ کاریم کیک۔ دود آن سفیر شفقت کاکاخیل، ایگزیکٹیو ڈائریکٹر سول سوسائٹی کولیشن فارکلائمیٹ چینج عائشہ خان ، ڈاکٹر عالیہ خان و فہم سردار ئسک ہم تران کریر۔ چیئرمین این ڈی ایم اے لیفٹیننٹ جنرل انعام حیدر ملک تینا تران اٹی مچ آ دنیا ٹی مون آ بروک آ جغرافیائی سیاسی منظرنامہ آ زورشاغا ہراڑے چندی ملک آتیٹی انسانی سلامتی نا چیلنج آک یکتاوڑاٹ پاش مریرہ۔
