اسلام آباد۔ 04 اکتوبر (اے پی پی) پاکستان نا اولیکو خلاباز زالبول نمیرہ سلیم پارینے کہ خلاء ٹی روانگی نا بابت ٹریننگ نا اولیکو دے تینا اسپیس سوٹ و پیراشوٹ ءِ سہی وڑاٹ فٹ کننگ نابارواٹی ہیل کرے، ننے اسپیس شپ اٹی سیٹ آتا فعالیت و تینا سیٹ بیلٹ ءِ تفنگ و ملنگ نا بارواٹی ہیل تننگا۔ خلاء ٹی روانگی آن مست تینا ٹریننگ نا بابت گپ وتران کرسا اوپارے کہ ٹریننگ نا اولیکو دے ننے ہیل تننگاکہ نن ہراوڑ صفرکشش ثقل آ تینا نشست آن بش مننگ کیک۔ درو ننتون ٹریننگ نا اسہ پین دلچسپ ءُ دے اس ئس۔ یات سلے کہ نمیرہ سلیم پاکستان نا اولیکو زالبول ءِ ہرا قطبین آ سرمننگ ناشرف ہم دوئی ءِ۔ نمیرہ سلیم 21 اپریل 2007 ء آ قطب قطبی و 8 جنوری 2008 ء آ قطب سویلی ٹی پاکستان نا بیرک ءِ چست کرینے۔ نمیرہ سلیم خلاء ٹی روانگی آن مست تدوک آ تُو نگران بنجائی وزیر حوالکاری مرتضیٰ سولنگی تون اوڑدہی ہم کریسس و اودے تیناخلائی سفر آ روانگی نا بابت تیاری تیان معلومدارکریسس۔ نمیرہ سلیم خلاء ٹی پاکستانی بیرک ءِ بڑز کننگ نا عزم تخک۔ اونا سفر خلائی پٹ وپول اٹی پاکستان ءِ ودوک آ ساڑی گری نا نشانی ءِ ہرا قوم اکن اہم سرسہبی اسے۔ نمیرہ سلیم نا دا کوشست آن پاکستان نا امن پسند و ترقی پسند ملک انا حیثیت اٹ مثبت تشخص تالان مریک۔
