اسلام آباد۔ 21 ستمبر (اے پی پی) چیئرمین سینیٹ محمد صادق سنجرانی نا درخواست آ جہانی ادارہ جان جوڑی ضلع چاغی کن ایمبولینس فراوان کرے۔ چیئرمین سینیٹ منہ وخت مست ضلع چاغی نا مر مر انگا علاقہ غاتیٹی جان جوڑی نا آسراتی تے گچین کننگ و جان جوڑی نا ہند آتسکان ناجوڑ آتا آسان رسینگ کن خصوصی وڑاٹ ایمبولینس فراوان کننگ نا خواست کریسس۔ دا رداٹ جہانی ادارہ جان جوڑی ضلع چاغی کن ایمبولینس، طبی ازباب، الٹراساؤنڈی و ایکسرا مشین فراوان کرینے۔ دا چرجوئی ٹی جہانی ادارہ جان جوڑی نا اسلام آباد اٹی واقع دفتر اٹی اسہ دود اسے نا بست وبند کننگا۔ دود انا مہمان خاص چیئرمین سینیٹ محمد صادق سنجرانی ئسک، دود اٹی سینیٹر نصیب اللہ بازئی ہم ساڑی ئسک۔ داوخت آ ڈبلیو ایچ او نا پاکستان اٹی سروک ڈاکٹر پلیتھا گونرا تھنا ماہیپا لا پارے کہ پاکستان ءِ داوخت آ قدرتی آفت مون تروک ءِ۔ زہمی ضلع غاتیٹی عارضی جاج جوڑی نا ہند و طبی ازباب آتون اوار ایلو المی گڑافراوان کننگ انگ ءِ۔ زہمی علاقہ غاتیٹی ملیریا، ڈینگی و ڈائریا نا دین تالان مسنے و مخلوق ءِ غذائی کاختی ہم مون تروک ءِ۔ اوپارے کہ چناتیٹی غذائی کاختی نا چٹفنگ کن ہم کاریم کننگ اُن و دا مشکل وخت اٹی پاکستان ءِ ہرممکن امداد فراوان کننگ کن کوشست کننگ اُن۔ چیئرمین سینیٹ محمد صادق سنجرانی پارے کہ دامشکل وخت اٹی جہانی ادارہ جان جوڑی نا کنڈآن پاکستان نا پبی کمک آ سینیٹ و پاکستان الس نا کنڈآن منت واری ءِ ہرفیوہ و نوکاپ نا بنداوی بھسکاری تیان پد داسہ ہم زہمی تا پورو بحالی نا مشکل ریسہ سلوک ءِ۔ غٹ ادارہ غاک مخلوق ءِ ساف دیر و غذا فراوان کننگ آ چکار تخر۔ زہمی علاقہ غاتیٹی مخلوق ءِ دینی مرض آتیان بچفنگ کن ڈبلیو ایچ او نا کوشست ستاکڑزک۔ چیئرمین سینیٹ پارے کہ بلوچستان نا مر مر انگا پسماندہ علاقہ غاتسکان جان جوڑی نا بنداوی آسراتی تا فراوانی کن ڈبلیو ایچ او گچین کڑد ادا کرینے۔ اوپارے کہ جان جوڑی نا بشخ اٹی مر مر انگا علاقہ غاتیٹی بھاز انگا گام گیج کننگ داسکان ارے و الس اسکان بنداوی آسراتی تا فراوانی اسہ بھاز بھلو ویل اسے ولے جہانی ادارہ جان جوڑی نا کمک اٹ داویل آتا مون ءِ تورسا پسماندہ علاقہ غاتیٹی ہم جان جوڑی نا بنداوی آسراتی تا گچینی ٹی کمک رسینگک۔
