برانزنا آڑ اٹ بیدادی ، توڑ پھوڑ نا موکل تننگ مفک ، بنجائی وزیر داخلہ نا چارسدہ ٹی فیڈرل کانسٹیبلری ٹریننگ سینٹر اٹ تران

چارسدہ۔ 28 اگست (اے پی پی)بنجائی وزیر داخلہ محسن نقوی پارینے کہ پرامن برانزہر شاری نا حق ءِ، کانود برانزنا وڑ و پیم ءِ پیدواروڑاٹ متعین کرینے، کانود نا دنگ اٹ رہینگسا پرامن برانز آ کس اسے اعتراض اف، ملک انا امن و ایمنی و سوگوی ءِ ہچ ءُ وڑ اسے ٹیلتاڑنگ نا موکل تفنہ ۔ او جمعہ نادے آ چارسدہ ٹی فیڈرل کانسٹیبلری ٹریننگ سینٹر شب قدر نا دورہ نا وخت آ تران کریکہ ۔ بنجائی وزیر داخلہ محسن نقوی اینٹی رائٹ ونگ انا خاص ہیلکاری مشق آتا معائنہ ءِ کرے و کارندہ غاتا کسبی لائخی، پوسکن تربیت و آپریشنل تیاریتا ستاءِ کرے، بنجائی وزیر داخلہ اینٹی رائٹ ونگ نا کارندہ غاتا جتا جتا عملی مشق آتے ہرا۔ کارندہ غاک مچی ءِ کنٹرول کننگ، حساس جاگہ غاتا رکھ، پرتشدد حالیتآتون مون تننگ و امن و ایمنی ءِ برقرار تخنگ نا بابت تیناکسبی لائخی تا عملی درشانی ءِ کریر۔ وزیر داخلہ محسن نقوی نا پاننگ ئس کہ اینٹی رائٹ فورس ءِ پوسکن آ وڑتیا تربیت تننگانے، امن و ایمنی نا ہر حالیتآتون مون تننگ کن فورس پورو تیار و پبی لائخی تخک۔ او پارے کہ برانزنا آڑ اٹ بیدادی ، توڑ پھوڑ، سرکارییا پرائیویٹملکیت آتے نسخان تننگ و امن و ایمنی ءِ خراب کننگ نا ہچ کس ءِ موکل تننگ مفک ۔ ریاست امن و ایمنیءِ برقرار تخنگ نا تینا زمواری ءِ پورو کیک و کانود ءِ دوٹی ہلوک آ زموار آتون کانود نا رداٹ مون تننگک ۔ او پارے کہ امن و ایمنی نا ساڑی حالیتآتیٹی فیڈرل کانسٹیبلری نا کڑد مچ آ ملک اٹ بھاز اہمیت تخک۔ نمے ہر وڑ نا چیلنجآتون مون تننگ کن تیار مروئی ءِ، تینا تربیت ءِ پبی وڑاٹ پورو کبو و پورو کسبی تیاری اتون میدان اٹ دڑنگبو۔ نمے جہانیآب انا پوسکن پروٹیکشن گیئر تننگ انگ ءِ تانکہ فیلڈ اٹ نمارکھ و آپریشنل لائخی ءِ پک کننگ مرے۔ بنجائی وزیر داخلہ محسن نقوی غٹ ورنا تے گیس ماسک تننگ نا پارت کرسا پارے کہ نماتربیت آ خاص چکار کننگانے، ہر اوڑ نا ٹریننگ خواری ، لگن و پورو کسبی جوزہ اتون پورو کبو۔ بنجائی وزیر داخلہ ایف سی ہیڈکوارٹر اٹ گوازی تا گچین آسراتی تننگ نا پڑو ءِ کرسا پارے کہ جہانیآب انا سوئمنگ پول ہم جوڑ کننگک۔ بنجائی وزیر داخلہ بیرک آتا دورہ ءِ کرے، کارندہ غاتون اوڑدہی کرے و اوفتا ویلآتا اَرفے ۔ بنجائی وزیر داخلہ ایف سی ہیڈکوارٹر اٹ کارندہ غاتا غٹ واش روم تے اول سرآن جوڑ کننگ نا پارت کرے۔ بنجائی وزیر داخلہ کارندہ غاتیان سوج کرے کہ نم گدرینگوک آ دورہ اٹی لوڈشیڈنگ نا ویل ءِ ہرفیسورے، داسہ انت حالیت ءِ؟ کارندہ غاک پاریر کہ داسہ لوڈشیڈنگ مفک و بے سلنگ آن بجلی تننگ انگ ءِ۔ کارندہ غاک ویلآتے ایسر کرفنگ آ بنجائی وزیر داخلہ محسن نقوی نا منت واری ءِ ہرفیر۔ بنجائی وزیر داخلہ اسہ کارندہ اسے نا لمہ نا کینسر نا درمان کن دمدستی گام گیج نا پارت ہم کرے۔ حوال اٹ پاننگا کہ تربیت ہلوک آ کارندہ غاتیٹی غٹ صوبہ غاتون اوار آزاد کشمیر و گلگت بلتستان ءِ نمائندگی دوئی ءِ وخت اس کہ ہیلکاری پروگرام اٹ اولیکو وار 35 زالبول کارندہ ہم اوار ءُ۔ آئی جی فیڈرل کانسٹیبلری، ڈی آئی جی ٹریننگ، ڈی او ایف سی و ایلو بڑزکو آفیسر آک ہم دا وخت آ ساڑی ئسر۔