وزیرِ اعظم نا ایف بی آر اصلاحات آتے مقررہ وخت اٹ پورو کننگ، خراج دُزی و اسمگلنگ نا برخلاف کارروائی تے ترند کننگ نا پارت

اسلام آباد۔ 28 اگست (اے پی پی)وزیرِ اعظم محمد شہباز شریف خراج دُزی ، اسمگلنگ و غیر کانونی کاروبار نا برخلاف گچین کارروائی تے ترند کننگ و ایف بی آر اٹ اصلاحات آتے مقررہ وخت انا تہہ ٹی پورو کننگ نا پارت کرسا پارینے کہ حکومت ملکی شونداری کن خراج نظام اٹ اصلاحات کننگ ءِ۔ وزیرِ اعظم محمد شہباز شریف نا کماشی ٹی ایف بی آر اٹ اصلاحات آ ہفتہ وار جاچ دیوان جمعہ نادے آ داڑے اڈ ہلک۔ وزیرِ اعظم آفس نا میڈیا ونگ انا کنڈآن جاری بیان نا رداٹ وزیرِ اعظم ءِ دیوان اٹ "پرال” نا تنظیم نو آ حوال تننگا۔ وزیرِ اعظم دیوان آن تران کرسا پارے کہ خراج نظام اٹ اصلاحات کن گام گیج آتا نفاذ ءِ معینہ مد اٹ پورو کننگے و اصلاحات نا تھرڈ پارٹی آڈٹ ءِ پک کننگے۔ وزیرِ اعظم پارے کہ ملکی شونداری کن خراج نظام اٹ اصلاحات نافذ کننگ اُن۔ او ڈیجیٹلائزیشن، پیدوار نا چاروکی و خودکار نظام ءِ ایف بی آر اصلاحات نا اہم تمبہ گوندسا خراج دُزی ، اسمگلنگ و غیر کانونی کاروبار نا برخلاف گچین کارروائی ءِ پین ترند کننگ نا پارت کرے۔ او ایف بی آر اٹ گچین شہرت نا گڈز ایویلیویٹرز نا تعیناتی نا عمل ءِ ستاکڑزوک گوندسا پارے کہ چیئرمین ایف بی آر و اونا ٹیم نا دا بابت کوشست آک ستاءکڑزہ۔ دیوان اٹ ایف بی آر اٹ برجااصلاحات، خاص کر "پرال” نا تنظیم نو، خراج نظام نا ڈیجیٹلائزیشن و اسمگلنگ نا توننگ کن کننگوک آ گام گیج آتیاسرجمی اٹ حوال تننگا ہراٹی پاننگا کہ خراج نظام ءِ پوسکن ، مربوط و ڈیٹا آ تالان جوڑ کننگ کن آئرس 3.0، پوسکن خراج آپریٹنگ ماڈل و سینٹرل ڈیٹا ہب آ ریسہ وار کاریمبرجاءِ۔ آئرس 3.0 نا ڈیزین کن جہانی کنسلٹنٹس آتا خذمت ءِ ہلنگانے ۔ حوال اٹ پاننگا کہ پرال اٹ ٹیکنالوجی، ڈیٹا سکیورٹی، آپریشنز و خراج ڈومین تون اوار چندی بشخ آتے ٹی پوسکن سینئرسرکڑدہ غاتانا تعیناتی کننگانے وخت اس کہ آئرس 3.0 نا رداٹ خراج نظام ءِ پین گچین جوڑ کننگ، آٹو خراج نا تصور ءِ پائلٹ کننگ و آخبت اٹ مصنوعی ذہانت و مشین لرننگ ءِ خراج وصولی ءِ گچین کننگ کن کاریم اٹ اتنگ نا ڈٹ آ کاریم ترندی اٹ برجاءِ۔ کسٹمز نا بشخ اٹ فیس لیس اسیسمنٹ نا مثبت اثر آتا بابت دیوان ءِ پاننگا کہ جنوریآن جون 2026ء اٹی فی گڈز ڈیکلریشن اوسط ریونیوٹی 12 درسد ودکی ریکارڈ کننگا۔ حوال اٹ پاننگا کہ فیس لیس اسیسمنٹ نا نتیجہ ٹی فی گڈز ڈیکلریشن نا محصول آتے ٹی گچینیاتون اوار اوار درآمدی بے ڈولی تا پیدواری و چاروکی ٹی ہم ودکی مسنے۔ کسٹمز اسیسمنٹ نا نظام ءِ پین مربوط جوڑ کننگ کن 280 گڈز ایویلیویٹرز نا بھرتی نا عمل گڈیکو ریسہ غاتیٹی ءِ۔ اسلام آباد اٹ سینٹرل اسیسمنٹیونٹ نا جوڑ کننگ آ ہم پیش رفت برجاءِ، عبوری انتظام نا رداٹ یونٹ ءِ 31 دسمبر 2026ء اسکان فعال کننگ وخت اس کہ پورو مربوط سہولت ءِ جون 2027ء اسکان پوسکن کمپلیکس اٹ فعال کننگ نا ہدف مقرر کننگانے۔ دیوان ءِ پاننگا کہ جولائی 2025 اٹ ڈیجیٹل انوائسنگ نا کمک اٹ 236 ارب روپئی نا ٹرانزیکشن مس وخت اس کہ جولائی 2026 اٹ اوفتا کچ 2.5 ٹریلین روپئی نا کچ آن گدرینگانے، و دسمبر 2026 اسکان ڈیجیٹل انوائسنگ نا کمک اٹ 4 ٹریلین روپئی نا ٹرانزیکشن نا ہدف مقرر کننگانے۔ اسمگلنگ نا توننگ نا بابت دیوان ءِ پاننگا کہ پیٹرولیم مصنوعات نا غیر کانونیات و در نا توننگ کن غٹ کانونی پیٹرول پمپس آتاجی آئی ایس ٹیگنگ، جی پی ایس نا کمک اٹ پیٹرولیم مصنوعات نا ٹریکنگ، آئل مارکیٹنگ کمپنی تا ای آر پی سسٹم ءِ ٹریکر تون منسلک کننگ و کانود نافذ کروک ادارہ غاتیکن مرکزی ٹریکنگ ایپ بشمول چندی گام گیج آتے پورو کننگانے۔ راہ-گزر ایپ انا کمک اٹ دونیم ہزار غیر کانودی پیٹرول پمپ آتے بند کرفسا اوفتا برخلاف کانودی کاروائی کننگانے وخت اس کہ پیٹرولیم مصنوعات نا فروخت نا ڈیجیٹل چاروکی و ایلو گام گیج آتیا ہم کاریم برجاءِ۔ وزیراعظم پارے کہ ایف بی آر اصلاحات نا غٹ گام گیج آتے تخوک آ مد انا تہہ ٹی پورو کننگے و اصلاحاتی عمل نا شفافیت، گچینی و پائیداری کن تھرڈ پارٹی آڈٹ ءِ پک کننگے۔ وزیراعظم خراج سسٹم ءِ پوسکن و گچین جوڑ کننگ، ریونیو وصولی ٹی ودکی و اسمگلنگ نا پورو توننگ کن اصلاحات آ عملدرآمد ءِ پین ترند کننگ نا پارت کرے۔ دیوان اٹ بنجائی وزیر اعظم نذیر تارڑ، ڈاکٹر مصدق مسعود ملک، احد خان چیمہ، محمد اورنگزیب، عطاء اللہ تارڑ، شزہ فاطمہ خواجہ، وزیر مملکت بلال اظہر کیانی، قومی اسمبلی نا باسک عثمان اویسی، گورنر اسٹیٹ بینک جمیل احمد، چیئرمین ایف بی آر و تعلقدار بڑزکو آفیسر آک بشخ ہلکر۔