اسلام آباد۔ 21 ستمبر (اے پی پی) وزیراعظم نا سلاہکار امور کشمیر و گلگت بلتستان قمر زمان کائرہ تون اسلام آباد اٹی فرینڈز آف کشمیر انٹرنیشنل نا چیئرپرسن غزالہ حبیب اوڑدہی کرے۔ اوڑدہی ٹی فرینڈز آف کمشیر انٹرنیشنل نا وائس چیئرمین عبدالحمید لون ہم ساڑی ئسک۔ اوڑدہی ٹی کشمیر نا ویل و مقبوضہ کشمیر اٹی انسانی حق انا تازہ حالیت آتیا سرجمی اٹ گپ وتران کننگا۔ اوڑدہی ٹی مقبوضہ کشمیر اٹی برجابھارتی ریاستی دہشت گردی نا ترندی اٹ مذمت ءِ کرسا سلاہکار امور کشمیر پارے کہ بھارت مقبوضہ کشمیر اٹی بیدس روک ٹوک نا انسانی حق ءِ لتاڑنگ ءِ۔ اوپارے کہ بنجائی حکومت کشمیر نا ویل ءِ جہانی کہول آ تالان کننگ اٹ تینا پبی کڑد ءِ ادا کننگ ءِ۔ اوپارے کہ وزیر خارجہ بلاول بھٹو زرداری دنیا نا ہرا فورم آ کاہک او غٹ آن مست کشمیر نا ویل آ ہیت کیک۔ اوپارے کہ اینو نا پوسکن آ دور اٹی جنگ ویل آتا ایسر اف۔ اوپارے کہ کشمیر نا ویل ءِ ایسر کننگ کن جہانی رائے عامہ ءِ پین آوار کروئی مریک ۔ سلاہکارامور کشمیر پارے کہ اونا وزارت کشمیر نا ویل انا بابت تینا کڑد ءِ ادا کننگ اٹی ءِ و اووزارت نا منصب ءِ سنبھالنگ تون کشمیر نا ویل آ کشمیر نا غٹ سیاسی جماعت آتا کانفرنس اس بٹنگا۔ اوڑدہی ٹی فرینڈز آف کشمیر انٹرنیشنل نا چیئرپرسن غزالہ حبیب کشمیر نا ویل انا بابت تینا ادارہ نا کوشست آتیان سلاہکار امور ءِ معلومدار کرے و پارے کہ فرینڈز آف کشمیر انٹرنیشنل کشمیر نا ویل ءِ جہانی کہول آ تالان کننگ اٹ تینا پبی کڑد ءِ ادا کننگ ءِ۔ اوپارے کہ کشمیری الس تینا حق خودارادیت کن ہڑدے تینا جان تے ندر کننگ ءِ۔ اوڑدہی ٹی فرینڈز آف کشمیر انٹرنیشنل نا وائس چیئرمین عدالحمید لون دا عزم انا درشانی ءِ کرسا پارے کہ ہروڑنا بھارتی غیرکانودی چم کشمیری تے مرعوب کننگ کپک و کشمیری ورناک بھارت آن تینا حق ءِ خودارادیت ءِ ہرحال اٹ پلرہ۔
