اسلام آباد۔ 21 ستمبر (اے پی پی) بنجائی وزیر واپار سید نوید قمر پارینے کہ پاکستان متحدہ عرب امارات تون چندی بشخ آتیٹی تینا تعلقداری تے قدر انا نظر اٹ ہرک، پاکستان اٹی کشت وکشار، جان جوڑی، ریڈی میڈگارمنٹس و سولر نا بشخ آتیٹی بھاز زیات پوٹینشل ساڑی ءِ۔ داخیال آتا درشانی ءِ او پاکستان اٹی متحدہ عرب امارات نا سفیر حماد عبید ابراہیم سلیم الزابی تون گپ وتران کرسا کرے ہراچارشنبے نادے آ داڑے اوڑتون اوڑدہی کرے۔ اوڑدہی ٹی ہڑتوم آ کنڈآتا واپار ءِ مون آ دننگ و کارپوریٹ سیکٹر اٹی تین پہ تینی کمکار ی ءِ ودفنگ نا گام گیج آتیا گپ وتران کننگا۔ داوخت آ بنجائی وزیر پارے کہ متحدہ عرب امارات تون پاکستان نا تعلقداری تین پہ تینی مہرومریبت و شرف آٹی ءِ۔ اوپارے کہ پاکستان متحدہ عرب امارات تون چندی بشخ آتیٹی تینا تعلقداری تے قدر انا نظر اٹ ہرک انتئے کہ کشت وکشار، جان جوڑی، ریڈی میڈگارمنٹس و سولر نا بشخ آتیٹی بھاز زیات پوٹینشل ساڑی ءِ۔ سید نوید قمر ہڑتوم آ ملک آتا نیام اٹ واپاری ڈل آتا ہن و بر ءِ ودفنگ آ زو ر شاغا ہراڑآن واپاری و اقتصادی تعلقداری تے سوگوی ملک۔ داوخت آ متحدہ عرب امارات نا سفیر پارے کہ پاکستانی پوریاگر برادری سال آتیان یو اے ای نا زرگزران و شونداری ٹی اہم ءُ کڑد اس ادا کننگ ءِ ولے او ہڑتوم آ کنڈآتا جامع معاہدہ غاتا کمک اٹ اوفتے پین سوگو کننگ نا خواہندار ءُ۔ حکومتی پالیسی تا ستاءِ کرسا حج متحدہ عرب امارات نا سفیر پارے کہ اولیکو وار دا ہُننگ مریک کہ ساڑی حکومت خاص وڑاٹ وزیراعظم شہباز شریف جہانی کہول آ تعلقداری تے استوار کرسا گڑاس کننگ نا خواہندار ءِ۔ اونوکاپ زدہ علاقہ غاتا مخلوق تون گڑتی و ہمدردی نا درشانی ءِ کرسا متحدہ عرب امارات نا حکومت نا کنڈآن پورو کمکاری نا باور کرفے و پارے کہ او مشکل نا داساہت اٹی پاکستانی ایلم تتون تفوک ءِ۔
