اقوام متحدہ۔ 21 ستمبر (اے پی پی) اقوام متحدہ پارینے کہ پاکستان ٹی تباہ کن نوکاپ آن 76 لکھ بندغ زہمی مسنو، 15 سد آن زیات زوال وکم و ود 80 لکھ بے اُرا مسنو، صوبہ سندھ ءِ سویلی علاقہ پدریسہ دیر ہرفنگ نا سوب آن تنکی نا گواچی ءِ۔ نوکاپ آن پد کمکی سرجزآتیٹی اختہ اقوام متحدہ نا ذیلی ادارہ غاتا اسیجائی بیان نا رداٹ پاکستان نا قدرتی آفت آن زہمی علاقہ غاتیٹی ہراڑے کمکی گڑاتا سخت گرج ءِ ہموڑے زہمی تسکان سرمننگ ہم مشکل اسے خاص وڑاٹ سویلی سندھ ہراڑے داسہ ہم چندی علاقہ غاک دیر اٹی ڈبنگوک ءُ۔ اوپارے کہ پاکسان اٹی نوکاپ آن 76 لکھ بندغ زہمی مسنو، کم و ود 80 لکھ بے اُرا و 1500 ان زیات زوال کرینو ہرافتے ٹی 552 چناہم اوار ءُ۔ اونا پاننگ ئس کہ یو این ادارہ غاک ہندی کمامدار آتون کمکی کارروائی تا چرجوئی ءِ برجاتخانے، ولے مخلوق کن جوان کچ اٹی خور، جاگہ و جان جوڑی نا حسب ضرورت آسراتی دوئی اف۔ اقوام متحدہ نا چناتا بابت فنڈ(یونیسیف) نا چیف آف فیلڈ آفس بلوچستان گیریڈ ابیرو کیلا اسہ پین زیات زہمی صوبہ (بلوچستان ) نا زوم آ حالیت ءِ بیان کرسا پارے کہ داڑے نوکاپ اٹی سڑک و پول آتے دیر درینے، ای داسہ او کشاری علاقہ غان مرسا بسونٹ ہراڑے داوخت آہم دیر سلوک ءِ۔ اوپارے کہ داسہ نوکاپ زہمی کمیونٹی تیٹی دماغی ملیریا و ایلو ناجوڑی تالان مننگ ءِ ہرافتا درمان کن دوائی ہم دوئی اف، مخلوق تون رہینگ انگ کن جاگہ اف و بیننگ کن لویس اسکان اف۔ پناہ گزین تا بابت اقوام متحدہ نا دارہ یواین ایچ سی آر نا ایشیا و پیسیفک کن ترجمان بابر بلوچ نا رداٹ پاکستان اٹی 7.6 ملین مخلوق نوکاپ اٹی بے اُرا مسنو ہرافتیان کم و ود6 لکھ کمکی ہند آتیا رہینگ انگ ءُ، ننا نوکاپ زہمی علاقہ غاتیٹی 1.2 ملین کمکی گڑا ہندی کمامدار آتسکان سرکننگ نا ڈٹ ءِ ہرافتیان 10 لکھ فراوان کننگانے۔ اوپارے کہ ملک انا بھاز انگا بشخ آک خاص وڑاٹ سویلی سندھ و دے ٹکی بلوچستان نا علاقہ داسہ ہم دیر اٹی ءُ۔ اونا پاننگ ئس کہ غٹ آن زیات زہمی علاقہ غاتیٹی نوکاپی دیر خشک مننگ اٹی شش تُو اسکان نا وخت لگنگ کیک۔ بابر بلوچ پارے کہ پاکستان نا 1.3 ملین رجسٹرڈ اوغان باہوٹ آتے ہم داحالیت آتا گواچی ءُ، اسہ کساس اسے نا رداٹ نوکاپ آن زہمی 80 آن 45 ضلع غاتیٹی 800،000 اوغان ءُ۔
