اسلام آباد۔ 21 ستمبر (اے پی پی) ایشیائی شونداری بینک پارینے کہ ساڑی آ بدترین نوکاپ ، مالیاتی و پیشن نا زرتس آتیٹی توازن کن سخت گیر پالیسی نا سوب آن مالی سال 2023 اٹی پاکستان نا زرگزران نا نمو نا شرح 3.5 درسد اسکان مننگ نا گمان ءِ۔ داہیت ءِ ایشیائی شونداری بینک ایشین ڈولپمنٹ آؤٹ لک 2022 نا پن اٹ شینک مروک آ رپورٹ اٹی پارینے۔ رپورٹ اٹی پاننگانے کہ 2020 اٹی 6 درسد نمو آن پد ہم ساڑی آ بدترین نوکاپ، مالیاتی و پیشن نا زرتس آتیٹی توازن کن سخت گیر پالیسی نا سوب آن مالی سال 2023 اٹی پاکستان نا زرگزران نا نمو نا شرح 3.5 درسد اسکان سلک۔ رپورٹ اٹی پاننگاکہ مالی سال 2022 اٹی ہندی کھپت اٹی ودکی، کشت وکشار ، خذمت و بھلا صنعت آتا پیدوار اٹی نمان نمو نا سوب آن جی ڈی پی ٹی 6 درسد ودکی ممکن مس ولے 2023 اٹی چاگڑدی اڑاند، ڈبل ڈیجٹ افراط زر و سخت زری و مالیاتی پالیسی نا سوب آن پاکستان اٹی جی ڈی پی نا نمو نا پیشنگوئی ءِ کم تخنگانے۔ پاکستان اٹی ایشیائی شونداری بینک انا کنٹری ڈائریکٹر ینگ یی پارے کہ ساڑی آ بدترین نوکاپ پاکستان نا زرگزرانی منظر نامہ کن بھلو خطرہ و گڑتی اس ودی کرینے۔ اوپارے کہ ننے اومیت ءِ کہ نوکاپ آن پد پوسکن تفنگ و بحالی نا سرجزآتیکن خاطر خواہ جہانی کمک دوئی مریک ہراڑآن نمو ٹی ودکی آن بیدس راجی شونداری و راج انا زرگزرانی وڑاٹ نزور تپہ غاتے رکھ کننگ اٹ کمک رسینگک۔ اوپارے کہ ایشیائی شونداری بینک پاکستانی الس کن بحالی، تعمیر نو، روزگار و بنداوی پنجر نا مریس معیاد بنداو تیا بحالی کن پیکج اس تیار کننگ ءِ۔ رپورٹ اٹی پاننگاکہ سال 2022 اٹی کھپت اٹی 10 درسد ودکی مس ہراڑآن روزگار و مخلوق نا کٹیا ٹی ودکی مس، رپورٹ اٹی پاننگانے کہ سال 2022 اٹی کشت وکشار نا بشخ اٹی 4.4 درسد نا نمو مس ولے نوکاپ نا سوب آن بروک آ سال اٹی دا بشخ اٹی متعدل نمو نا اومیت ءِ ، بروک آ سال کشاری مداخل نا نہاد اٹی ودکی مریک ہرانا خذمت و ریٹیل بشخ انا نمو آ ہم اثر تمک۔ رپورٹ اٹی افراط زر انا زور و اونا شرح 18 درسد اسکان مننگ نا گمان ظاہر کننگانے۔
