کوئٹہ۔ 21 ستمبر (اے پی پی) ینگ ڈاکٹر ایسوسی ایشن نا قائم مقام چیئرمین ڈاکٹر بہار شاہ پارینے کہ ساڑی آ طوفانی پِر و نوکاپ آن زہمی ضلع غاتیٹی ہلہلہ ئی بنداو تیا محکمہ جان جوڑی ، جہانی ڈونر تنظیم تتون ڈاکٹر آتا ٹیم گدریفسا مخلوق ءِ وخت آ طبی آسراتی تا فراوانی ءِ پک کننگے، داہیت ءِ او کوئٹہ پریس کلب اٹی پریس کانفرنس اٹی تینا تران اٹی پارے۔ اوپارے کہ ساڑی آ پِر تیان نصیر آباد، جعفر آباد، اوستہ محمد، جھل مگسی، لسبیلہ، قلعہ سیف اللہ، قلعہ عبداللہ، نوشکی و ایلو علاقہ غاک بھاز زہمی مسنو، اوپارے کہ کسرتا ملنگ آن پد ینگ ڈاکٹر ایسوسی ایشن نا ٹیمک مسٹ میکو دے آ ہموڑے رسینگار و کیمپ خلکر ہراڑے ناجوڑ آتے بنائی طبی امداد تننگ انگ ءِ، ولے ہموڑے حالیت آک نازرک ءُ، داوڑنا حالیت آتا مون ءِ توننگ اسہ ادارہ اسے نا وس انا ہیت اس اف، وائی ڈے اے اولیکو دے آن صوبائی وزیر جان جوڑی، سیکرٹری جان جوڑی و ایلو کمامدارآتیان خواست کرے کہ اقوام متحدہ ، جہانی ڈونرو ایلو غٹ تنظیم تے یکجا کرسا اسیجائی کوشست کننگے، تانکہ نن زہمی تے داحالیت آن کشنگ کین۔
