وزیراعظم محمد شہباز شریف اقوام متحدہ نا جنرل اسمبلی نا 77 می دیوان اٹی بشخ ہلنگ کن نیویارک آسرمس

نیویارک۔ 20 ستمبر (اے پی پی) وزیراعظم محمد شہباز شریف اقوام متحدہ نا جنرل اسمبلی نا 77 می دیوان اٹی بشخ ہلنگ کن نیویارک آ سرمسنے۔ وزیراعظم آفس نا میڈیا ونگ آن جاری بیان نا رداٹ نیویارک نا جان ایف کینیڈی انٹرنیشنل بالی پٹ آ اقوام متحدہ ٹی پاکستان نا آخبتی مندوب منیر اکرم ، واشنگٹن اٹی پاکستان نا سفیر مسعود خان، نیویارک اٹی پاکستانی قونصل جنرل عائشہ علی و ایلوبڑزکو کمامدار آک وزیراعظم ءِ بخیر کریر، او ملکہ برطانیہ الزبتھ دوم نا آخیریکو رسم آتیٹی بشخ ہلنگ آن پد برطانیہ غان نیویارک آ سرمس۔ نیویارک آن اے پی پی نمائندہ نا رداٹ سے شنبے نادے آ وزیراعظم شہباز شریف اقوام متحدہ نا سیکرٹری جنرل انتونیوگوتریس نا کنڈآن تروک آ بیابخیری ٹی بشخ ہلیک۔ او فرانس و اسپین نا صدر و آسٹریا نا چانسلر تون اوڑدہی کیک۔ وزیراعظم شہباز شریف نا یورپی یونین کونسل نا صدر چارلس مائیکل تون اوڑدہی و جہانی غذائی رکھ انا بارواٹی سینیگال نا صدر و افریقی یونین نا مہمانداری ٹی مروک آ سروکی دیوان اٹی بشخ ہلنگ ہم ایجنڈاٹی اوار ءِ۔ وزیراعظم شہباز شریف چارشنبے نادے آ آئی ایم ایف نا منیجنگ ڈائریکٹر کرسٹالینا جارجیو و جہانی بینک انا صدر ڈیوڈ ملپاس تون ہم اوڑدہی کیک۔ وزیراعظم ترک صدر رجب طیب اردوان و ایران نا صدر ابراہیم رئیسی تون ہم اوڑدہی کیک۔ او اقوام متحدہ نا جنرل اسمبلی نا صدر ساباکوروسی تون اوڑدہی کیک و امریکی صدر جوبائیڈن نا کنڈآن تروک آ بیابخیری سوارہ ٹی بشخ ہلیک۔ وزیراعظم فن لینڈ نا صدر سائولی نی نیستو تون اوڑدہی کیک و ترک صدر و اونا اُرائی نا اعزاز اٹی بیابخیری دے انا اِرغ اس ہم ایتک۔ مائیکرو سافٹ نا بانی بل گیٹس، اقوام متحدہ نا سروک، چین نا صدر و جاپان نا وزیراعظم تون اوڑدہی ہم وزیراعظم نا ایجنڈا ٹی اوار ءِ۔ وزیراعظم شہباز شریف لکسمبرگ نا وزیراعظم زاویئر بٹیل و ملائیشیا نا وزیراعظم اسماعیل صابری یعقوب تون ہم اوڑدہی کیک۔ وزیراعظم جہانی میڈیا تون گپ وتران ہم کیک۔ وزیراعظم شہباز شریف 23 ستمبر آ اقوام متحدہ نا جنرل اسمبلی آن تران کیک۔