سعودی ڈل ءَ مزن وزیر ءَ گوں گند ءُ نند کتگ، دیریں سیادی ءَ را مھکمیں تجارتی ءُ سرمایہ کاری ءِ شریکداری ءَ بدل کنت، محمد شہباز شریف

اسلام آباد۔28اگست (اے پی پی): مزن وزیر محمد شہباز شریف ءَ پاکستان ءُ سعودی عرب ءِ نیام ءَ گہتریں براتی سیادی ءِ سر ءَ چمشانک دیان ءَ گوشت کہ دوئیں ملک اسٹریٹجک شریک اَنت، دیریں سیادی آناں مھکمیں تجارتی ءُ سرمایہ کاری ءِ شریکداری ءَ بدل کن اَنت، پاکستان، سعودی عرب ءُ ترکی ءِ نیام ءَ مکہ ءِ یکجاھیں دفاع ءِ معاہدہ ءِ تہ ءَ نزیکی اتکگ۔ کلیں دمگ ءَ امن ءُ ایمنی ءِ ھاترا جھد کنگ ءَ اِنت۔ آئی ءَ اے ھیالانی درشانی سعودی عرب ءِ چاگرد، آپ ءُ کشت ءُ کشاری ءِ وزیر انجینئر عبدالرحمن بن عبدالمحسن الفضلی ءَ گوں گپ ءُ تران ءِ ساھت ءَ کت اَنت آئی ءَ جمعہ ءِ روچ ءَ مزن وزیر گس ءَ آئی ءَ گوں گند ءُ نند کت۔ مزن وزیر کارگس ءِ میڈیا ونگ ءِ رد ءَ مزن وزیر ءَ سعودی وزیر ءُ آئی ءِ ڈل ءَ را وش اتک کتگ ءُ گوشت کہ دوئیں ملک آنی نیام ءَ گہتریں براتی سیادی است انت۔ دو مسجد مقدس ءِ نگہبان شاہ سلمان بن عبدالعزیز السعود ءُ ولی عہد محمد بن سلمان بن عبدالعزیز السعود ءِ نیکیں واھگ آنی درشان کنان ءَ آئی ءَ گوشت کہ سعودی عرب، ترکی ءُ پاکستان ءِ نیام ءَ گوستگیں مکہ ءِ یکجائی دفاعی معاہدے ءَ اے سئیں ملک آناں یک امن ءُ ایمنی ءِ نزیک کتگ ۔ آئی ءَ گوشت کہ پاکستان ءُ سعودی عرب اسٹریٹجک شریک اَنت پمیشکا نوں دوئیں ملک اقتصادی ءُ کشت ءُ کشاری شوبگ آنی تہ ءَ کمک ءَ را گیش گیش کنگ ءِ سر ءَ دلگوش بہ کن اَنت تانکہ دیریں سیادی ءَ را یک مھکمیں تجارتی ءُ سرمایہ کاری شریکداری ءِ تہ ءَ بدل کنگ بہ بیت ایشی ءَ چہ دوئیں ملک آناں سیت رسیت۔ مزن وزیر ءَ دوئیں ملک آنی نیام ءَ برجاھیں جوانیں کمک ءِ سر ءَ وشی ءِ درشان کت ھاسیں رنگ ءَ پاکستان ءَ چہ سعودی عرب ءَ کشت ءُ کشاری پیداوار آنی برآمد ءِ ھوالگ ءَ۔ گند ءُ نند ءَ پاکستان ءَ کشت ءُ کشاری پیداوار ءِ تہ ءَ گیشی ءِ واستہ ٹیکنالوجی، پٹ ءُ پول ءُ دیمروئی ءِ وسیلگ ءَ کمک ءَ را گیش کنگ ءُ آپی وسیلگ آناں گیش جوانیں رنگ ءَ کارمرد کنگ ءِ سر ءَ ھم ھیال ریچی کنگ بوت۔ مزن وزیر ءَ جار جتگ کہ پاکستان ءَ چہ کشت ءُ کشاری زانتکار آنی ڈل زوت ریاض ءِ تر ءُ تاب ءَ کنت اودا دوئیں ملک آنی نیام ءَ اے جیڈھ آنی سر ءَ گیش گپ ءُ تران کنگ بیت تانکہ اے شریکداری ءِ سرجمیں توان ءَ را کارمرد کنگ بہ بیت۔ سعودی وزیر ءَ گرمیں وش آتک ءُ مہمان داری ءِ پد ءَ مزن وزیر ءِ شگر ءُ منت گپت۔ آئی ءَ سعودی عرب ءِ کشت ءُ کشاری، آپ ءُ وردن ءِ سلامتی ءِ شوبگ ءَ پاکستان ءِ گوما کمک ءَ را گیش گیش کنگ ءِ جزم ءِ سر ءَ زور پر دات۔ گند ءُ نند ءَ وفاقی وزرا رانا تنویر حسین، محمد اورنگزیب، عطا ءتارڑ، جام کمال خان، ڈاکٹر مصدق ملک، جنید انوار چوہدری،، بلال اظہر کیانی، مزن وزیر ءِ ھاسیں کمکار  طارق فاطمی اورڈاکٹر سید توقیر شاہ  ءُ  دگہ مزنیں کارندہ آں  بہر زرتگ۔