مچ آ دنیا ٹی تعلیم نا بشخ بھاز تنکی تا گواچی ءِ، یواین سیکرٹری جنرل نا ایجوکیشن سمٹ آن تران ، وزیر مملکت حناربانی کھر نا مسن تا تعلیم نا گام گیج آتیا زور

اقوام متحدہ۔ 20 ستمبر (اے پی پی) اقوام متحدہ نا سیکرٹری جنرل انتونیوگوتریس خبڑدار کرینے کہ مچ آ دنیا ٹی تعلیم نا بشخ بھاز تنکی تا گواچی ءِ، و داتنکی تون مون تننگ کن دا بشخ اکن درکار فنڈ جتا کننگ و دازرکاری ءِ ہیل کننگ نا عمل نا بشخ اس جوڑ کننگ المی ءِ۔ اقوام متحدہ نا کنڈآن مسہ دے ئی ایجوکیشن سمٹ نا ایسری سیشن آن تران اٹی اوپارے کہ نن غٹ اینو انتس ارین تعلیم نا سوب آن اُن۔ اوپارے کہ زند، زرگزران و راج ءِ بدل کننگ کن ننے ساڑی آ تعلیمی نظام ءِ بدل کروئی مریک۔ داوخت آ پاکستان نا وزیر مملکت خارجہ امور حنا ربانی کھر تیناجی۔ 77 و چین نا نمائندگی ءِ کرسا جامع، آب اٹ و غٹ، خاص وڑاٹ مسن تیکن مساوی تعلیم نا بابت بھرمی گام گیج آتا گرج آزور شاغا ۔ نوبل انعام یافتہ پاکستانی و یواین میسنجر فارپیس ملالہ یوسفزئی تینا تران اٹی مچ آ دنیا ٹی اسکول آتے مسن تیکن رکھ جوڑ کننگ و ہر اسہ چناڑکن علم دوئی کننگ نا حق انا رکھ انا خواست کرے تانکہ چناتیکن آخبت ءِ رکھ جوڑ کننگ مرے۔ سروک دیوان نا ایسری آ جاری اعلامیہ ٹی پاننگاکہ دا دیوان اٹی شریک 130 ملک آتا راہشونک تعلیمی نظام نا احیاو تعلیم نا بشخ ءِ مون تروک تنکی تتون مون تننگ نا کوشست آتے ترند کننگ نا عزم کرینو۔ دا عزمءِ  دنیا نا 115 ملک آتا راہشون، استاد، طالب علم و سول سوسائٹی نا نمائندہ غاتا سلاہ و سوج آتے مون آ تخسا کننگانے۔ اعلامیہ ٹی پائیدار شونداری نا ہدف آتا دوئی کننگ اٹ تعلیم نا بنداوی کڑد ءِ ہم تالان کننگانے۔ اقوام متحدہ نا سروک داوخت آ تینا تران اٹی مستی پارے کہ گچین وسیلہ و اسکول و یونیورسٹی تسکان رسینگ تخوک آ ہزگار مخلوق گچین ملازمت دوئی کیک وخت اس کہ نیزگار تپہ خاص وڑٹ مسنک، بے اُرا بندغ و معذور طالب علم آتے ہمو تعلیمی قابلیت ءِ دوئی کننگ اٹ بھاز اڑاند مون تروک ءِ ہرا اوفتا زند اٹی بدلی اتنگ کیک۔ انتونیوگوتریس پارے کہ کورونا دین انا جہانی دین پائیدار شونداری ہدف آتا دوئی کننگ ءِ بھلو نسخان اس سرکرینے و اوٹی غٹ اکن مساوی بنداو تیا آب اٹ تعلیم نا ہدف غٹ آن زیات زہمی مسنے۔ اوپارے کہ کیشن آن دی فیوچر آف ایجوکیشن رپورٹ کارڈ انا رداٹ نظام تعلیم ءِ متکن و تنگ نظری آ مبنی نصاب و غیر تربیت یافتہ و کم تنخواہ ہلوک آ استاد آتیا اِلنگ مفک۔ اوپارے کہ ساڑی آ تعلیمی نظام طالب علم و راج ءِ بے سہبی آن دوچار کننگ اٹی ءِ۔ داکان بیدس ڈیجیٹل تعلیم نا ذریعہ اسکان رسینگ اٹ بے بریبری حالیت آتے پین سنگین کرینے۔ اوپارے کہ تعلیم بندغ نا مچ آ زند اٹی اونا ترقی و ذہنی نشوونما و خاص وڑاٹ اونا ویل آتا ایسری ٹی کڑد ادا کے۔ اوداوخت آ اوغانستان اٹی مسن تا تعلیم نا بابت غٹ پابندی تے چٹفنگ نا گرج آ ہم زور شاغا۔ اوداوخت آ چاگڑدی بدلی و انسانی حق انا بابت تعلیم نا اہمیت ءِ ہم تالان کرے۔ سروکی دیوان آن یونیسیف نا سروک کھیترین رسل، یواین ایڈز نا سروک ونی بائی اینی ایما، یونیسکو نا سروک آندرے ایزولے و ایلوفک ہم تران کریر۔