یواین سیکرٹری جنرل نا پائیدار شونداری نا ہدف آتے بچفنگ و گچین دنیا نا کنڈآ پدی بننگ کن یکجا مننگ نا خواست

اقوام متحدہ۔ 20 ستمبر (اے پی پی) اقوام متحدہ نا سروک جنرل انتونیوگوتریس و 77 می جنرل اسمبلی نا صدر کاسا باکوروسی دوشنبے نادے آ جہانی راہشون و خیرسگالی سفیر آتون پائیدار شونداری نا ہدف آتے بچفنگ و گچین دنیا نا کنڈآ پدی بننگ کن جہانی خواست اٹی شمولیت کرے۔ اقوام متحدہ نا سروک پارے کہ دنیا ءِ یوکرین جنگ و کورونا دین انا جہانی دین انا سوب آن کیہی تنکی تا مون تروک ءِ۔ اوداوخت آ غٹ جہانی راہشون تیان ساڑی آ تنکی تا مون ءِ توننگ، ودوک آ گرج آتے پورو کننگ کن سرکاری و نجی بشخ آتیان پین مالیات و زرکاری نا خواست کرے۔ اوجھیڑہ، آب و ہوا نا بھسکاری ، بشخنگ، بے روزگاری، بھلو کچ اسے آ ہمپ و بٹ و ایلو ساڑی آ چیلنج آتے بھلو خطرہ اس امنا کرسا پارے کہ داسہ پین انتظار کننگ نا وخت اف بلکن گام گیج آتیا عملدرآمد کننگ نا وخت ءِ۔ اوپارے کہ نن تعلیم نا تنکی، بے روزگاری، زالبول آتا بریبرحق، جان جوڑی نا خیالداری، حیاتیاتی تنوع نا رکھ و آب وہواٹی بدلی کون آ چیلنج آتیا سمجھوتہ کننگ کپنہ و نئے اِلنگ کینہ۔ اوپارے کہ دا غٹ بشخ آتیکن ورناو بروک آ چینک کارروائی نا خواست کننگ اٹی ءُ و داسہ نن اوفتے پین مایوس کننگ کپنہ۔ اوپارے کہ ننے ہرا خطرہ غاتا مون تروک ءِ او فتے یکجا مرسا ایسر کننگ مریک۔ جنرل اسمبلی نا صدر کاسا باکوروسی اقوام متحدہ نا سروک نا لوز آتے ولدا پارسا پارے کہ دا مون تروک چیلنج آتیان پدی مننگ نا وخت اف و وخت بسنے کہ دنیا ءِ گچینی نا کنڈآ اتنگ نا بارواٹی سنجیدہ مرین ہرانا غٹ خوشگوار بھرم اس دوئی مریک۔ اواقوام متحدہ نا باسک ملک آتے پارینے کہ او کروک آ قول آتے پورو کیر۔ اوپارے کہ اسہ ہندن ءُ دنیا ہرا آب و ہوا نا تنکی آن دوچار ءِ  او ننکن پائیدار آخبت اس فراوان کننگ کپک و نن ہیت آ یخین کننگ کن تیار افن کہ آب وہوا نا تنکی بے سہب راج انا سوب آن مریک ہراٹی ہچ ءُ ناپید نسل اس مفک۔ اوپارے کہ نن غٹ اسہ انصاف اٹ، رکھ و دراخ جوڑ دنیاسے نا حقدار اُن ہرانا ساڑی و آخبت ننا دوٹی ءِ۔