اقوام متحدہ، فلسطینی صدر محمود عباس نا جہانی راہشون تتون اوڑدہی، تین پہ تینی است خواہی نا امور نا بارواٹی گپ وتران

نیویارک۔ 20 ستمبر (اے پی پی) فلسطین نا صدر محمود عباس اقوام متحدہ نا سیکرٹری جنرل ، ہسپانوی وزیراعظم، انٹرنیشنل کمیٹی آف ریڈ کراس(آئی سی آرسی) نا سروک و ورلڈ جیوش کانگریس نا صدر تون جتا جتا اوڑدہی کرے و تین پہ تینی است خواہی نا امور نا بارواٹی گپ وتران کرے۔ فلسطینی خبررساں ادارہ نا رداٹ صدر محمود عباس تدوک آ دے اقوام متحدہ نا جنرل اسمبلی نا دیوان اٹی بشخ ہلنگ کن نیویارک آ سرمس ہراڑے او ہسپانوی وزیراعظم پیڈروسانچیز، اقوام متحدہ نا سیکرٹری جنرل انتونیوگوتریس، انٹرنیشنل کمیٹی آف ریڈکراس (آئی سی آرسی) نا سروک پیٹر مورر و ورلڈ جیوش کانگریس نا صدر رونالڈ لاؤڈرتون اوڑدہی کرے و اوفتے امن عمل اٹ تعطل و اسرائیلی کوزہ ٹی زند ءِ تیر کروک آ فلسطینی الس نا مشکل حالیت آتے مون آ تخسا سیاسی پیش رفت نا تازہ حالیت آتا بارواٹ معلومدار کرے۔ اوہسپانوی وزیراعظم آ زور شاغا کہ او فلسطینی ریاست ءِ امنا کے انتئے کہ اقوام متحدہ ٹی فلسطین کن جہانی تنظیم اٹی پورو رکنیت دوئی کننگ کن کوشست برجاءِ۔ ورلڈ جیوش کانگریس لاؤڈر نا صدر فلسطینی صدر ءِ پارے کہ دوریاستی ایسری نا بنداو آ دے ٹک و نیامی ٹی امن نا دوئی کننگ المی ءِ، دا مسخت نا دوئی کننگ کن صدر غٹ جماعت آتون اواری اٹ کاریم کننگ کن آمادگی نا درشانی ءِ کرے۔ آئی سی آر سی نا سروک اتون تینا اوڑدہی ٹی فلسطینی صدر اسرائیلی زندان تیٹی فلسطینی بندی تا حالیت آتیا گپ وتران کرے و اوفتا دزگیر باسک آتا خاہوت آتون اوڑددہی تے ودفنگ و اسرائیل نا غیرکانودی انتظامی حراست، بیدادی، طبی غفلت ءِ چٹفنگ و ناجوڑ، بزرگ ، زالبول و کم وئی بندی تے یلہ کننگ آ زور شاغا۔