وزیراعظم شہباز شریف جہانی راہشون تتون ویسٹ منسٹر ایبے ٹی ملکہ برطانیہ نا آخیریکو رسم آتیٹی بشخ ہلک

لندن۔ 19 ستمبر (اے پی پی) وزیراعظم محمد شہباز شریف دوشنبےنادے آ جہانی راہشون و شاہی خاہوت آتا باسک آتون ویسٹ منسٹر ایبے ٹی آنجہانی ملکہ الزبتھ دوئم نا آخیریکو رسم آتیٹی بشخ ہلک۔ وزیراعظم خصوصی وڑاٹ کوئین الزبتھ نا آخیریکو رسم آتیٹی بشخ ہلنگ کن لندن آ سرمسوسس ہرا 8 ستمبر آ 96 سال انا وئی ٹی کزیت کریسس۔ مچ آ دنیا غان 500 آن زیات ملک آتا نمائندہ غاک ملکہ نا آخیریکو رسم آتیٹی بشخ ہلکر ہرافتے ٹی امریکہ نا صدر جوبائیڈن، چین نا نائب صدر وانگ کشان، جاپان نا شہنشاہ ناروہیٹو، اردن نا شاہ عبداللہ، بیلجیم نا کنگ فلپ و کوئین میتھلڈے تون اوار اوار شاہی خاہوت آتا 2 ہزار آن زیات باسک آک بشخ ہلکر۔ کوئین الزبتھ ءِ سرکاری اعزاز اتون ونڈ سرکیسل اٹی کنگ جارج ششم میموریل چیپل اٹی تیناایماندار اَرے اتون شاہی قبرستان اٹی جہہ جاگہ کننگک۔ وزیراعظم پارے کہ آنجہانی ملکہ دولت مشترکہ نا باسک ملک آتا شاری تا نسل آتیکن طاقت نا ذریعہ ئسک، پاکستان نا الس ملکہ الزبتھ نا پاکستان نا 2 دورہ غاتے یات تخک، پاکستانی الس و برطانوی شاہی خاہوت نا نیام اٹ تعلقداری وخت اتون سوگو مسنے۔