پاکستان لائخی نا لحاظ اٹ کس اسے آن کم اف، ملکی شونداری کن پالیسی تا چرجوئی المی ءِ، احسن اقبال

لاہور۔ 19 ستمبر (اے پی پی) بنجائی وزیر ڈٹ بندی پروفیسر احسن اقبال پارینے کہ وطن عزیز نا 75 می یوم آجوئی آ فکر انا ساہت اسے کہ انت اینو نن ہموجاگہ غاٹی اُن ہراڑے ننے سلوئی ئسک، 2000 اسکان پاکستان سویلی ایشیا نا غٹ ملک آتیان مون آ ئسک اینو بھارت و بنگلہ دیش تون اوار غٹ ملک آک ننے آن مون آ پیش تمانو، پاکستان لائخی نا لحاظ اٹ کس اسے آن کم اف، ملکی شونداری کن پالیسی تا چرجوئی المی ءِ۔ داخیال آتا درشانی ءِ او دوشنبے نادے آ نیشنل اسکول آف پبلک پالیسی ٹی اولیکو اِرادے ئی پبلک پالیسی کانفرنس نا بنائی سیشن آن تران کرساکرے۔ داوخت آ اسکول آف نیشنل پبلک پالیسی نا ریکٹر ڈاکٹر اعجاز منیر، ڈین نیشنل اسکول آف پبلک پالیسی ڈاکٹر صفدر، ڈاکٹر سلمان، ڈاکٹر شجاعت علی، رضاعابد خان، ڈاکٹر نور الحق تون اوار ایلوبشخ ہلوک آک ساڑی ئسر۔ بنجائی وزیر ڈٹ بندی پارے کہ یکم اپریل آ پاکستان تون ڈویلپمنٹ بجٹ نا آخیریکو قسط ءِ تننگ کن پیسہ اَلوکہ، مرض انا سہی تشخیص آن پد ناجوڑی نا درمان ءِ کننگ ممکن مریک، پاکستان ءِ سیاسی سوگوی و پالیسی تا چرجوئی ہی مزل آ سرکننگ کیک، ٹیکٹر و چنگ چی نا پہیہ غاتون گاڈی چلینگ انگ کپک۔ اوپارے کہ داوخت آ پاکستان ءِ ملکی تاریخ نا بدترین نوکاپ مون تروک ءِ وخت اس کہ اِرا صوبہ غاتا زرگزران پورو وڑاٹ بھس مسنے، داخہ بھلو بھسکاری اسے آن پد نوکاپ زدہ علاقہ غاتا بندغ آتے دُوارہ اوفتا نت تیا سلفنگ بھاز بھلو چیلنج اسے۔ اوپارے کہ سوشل پالیسی اسہ خلوک ءُ تغ اس جوڑ مسنے، پوسکن آ ٹیکنالوجی آن کمک ہلنگ آن بیدس ویل آتا مون ءِ توننگ ناممکن ءِ، نن مسہ گڑا دولت ءِ ودفنگ، دولت نا بشخنگ و گلوبل اکانومی آ چکار بایدے تخن، ہنداڑآن ہی وسیلہ غاک ودی مریرہ۔ ہندا پبلک کانفرنس اٹی اسکالرو ایلو بشخ ہلوک آک سٹڈی پیپرآتے ہم خوانار۔