لاہور۔ 19 ستمبر (اے پی پی) وزیراعظم نا خصوصی کمکار عطاتارڑ پارینے کہ نوکاپ زدگان نا بحالی کن پنجاب و خیبرپختونخوا ٹی حکومت کروک آ جماعت اسے جاگہ اس ہم نظربفننگ ءِ، ایلو کنڈآ پنجاب اٹی نُت و دوائی تا کاختی ودنگ ءِ۔ دوشنبے نادے آ سیشن عدالت اٹی پیشی نا وخت آ میڈیا تون گپ وتران کرسا عطاتارڑ پارے کہ پنجاب حکومت پورو وڑاٹ بے سہب مسنے، صوبائی حکومت ءِ بٹفنگ کن ننتون بھاز انگا آپشن ارے، کنا خیال اف کہ وزیراعلیٰ چوہدری پرویز الٰہی پت انا وونٹ دوئی کننگ کیک۔ اوپارے کہ ملک اٹی قدرتی آفت نا سوب آن کروڑ آ مخلوق بے اُرا مسنو، بنجائی حکومت نوکاپ زہمی تا بحالی کن کاریم کننگ اٹی ءُ، وخت اس کہ پی ٹی آئی جلسہ جلوس کننگ اٹی ءِ۔ وزیراعظم نا خصوصی کمکار پارے کہ 18 می ترمیم آن پد نُت انا تنکی نا زمواری ءِ بنجائی حکومت آ شاغنگپ، پنجاب حکومت پورو وڑاٹ بے سہب مسنے۔
