اسلام آباد ۔ 19 ستمبر (اے پی پی) وزیراعظم محمد شہبا زشریف 19 آن 23 ستمبر اسکان نیویارک اٹی اقوام متحدہ نا جنرل اسمبلی نا 77 می دیوان اٹی بشخ ہلیک، وزیراعظم 23 ستمبر آ اقوام متحدہ نا جنرل اسمبلی آن اہم ءُ تران اس کیک، وزیراعظم چاگڑدی بدلی نا سوب آن بروک آ ساڑی آ تباہ کن نوکاپ نا رداٹ پاکستان ءِ مون تروک چیلنج ءِ جہانی فورم آ تالان کرسا چاگڑدی بدلی آن ودی مروک آ خطرہ تون بھازی اٹ مون تننگ کن پبی سلاہ تا خاکہ اس پیش کیک۔ دفترخارجہ نا رداٹ وزیراعظم محمد شہبا زشریف داوخت آ جہانی راہشون تے کشمیر نا ویل اتون اوار علاقائی و جہانی ویل آتیا پاکستان نا موقف و نقطہ نظرآن معلومدار کیک۔ اقوام متحدہ نا جنرل اسمبلی نا دیوان نا وخت آ وزیراعظم افریقی یونین، یورپی یونین و امریکہ نا کنڈآن اسیجائی وڑاٹ اڈ ہلوک آ غذائی رکھ آ جہانی سروک دیوان و کوپ 27 آ جہانی راہشون تا دیوان اٹی ہم بشخ ہلیک۔ دا ہڑتوم آ دیوانک اِ رااہم چیلنج آتون مون تننگ کن گچین گام گیج آتیا سجفنگ کن اہم ءُپلیٹ فارم ءُ۔ وزیراعظم تینا دورہ ٹی چندی ملک آتا وزیر اعظم، جنرل اسمبلی نا صدر، اقوام متحدہ نا سیکرٹری جنرل آن بیدس جہانی تنظیم ، جہانی مالیاتی ادارہ و آسودہی تنظیم تا سروک آتون اوڑدہی کیک۔ داوخت آ اقوام متحدہ نا سیکرٹری جنرل و امریکی صدر نا کنڈآن تروک آ بیابخیری ٹی جہانی راہشون تے اسہ ایلو تون گپ وتران نا موقع ملک۔ وزیرخارجہ بلاول بھٹو زرداری ہم وزیراعظم تون اوار مریک و او چندی دود آتیٹی بشخ ہلنگ آن بیدس ایلو ملک آتا وزیرخارجہ غاتون اوڑدہی کیک، او میڈیا و تھنک ٹینک اتون گپ وتران آن بیدس جی 77 و چین نا وزیر خارجہ و او آئی سی نا سالانہ دیوان و جموں وکشمیر آ او آئی سی رابطہ ٹولی نا دیوان اٹی ہم بشخ ہلیک۔
