لندن۔ 19 ستمبر (اے پی پی) وزیراعظم محمد شہباز شریف یک شنبے آ لندن اٹی برطانیہ نا پوسکن آ بادشاہ نا کنڈآن شرفمند آ مہمان تیکن تروک آ استقبالیہ ٹی شاہ چارلس سوئم تون اوڑدہی کرے۔ اونا لمہ ملکہ الزبتھ دوئم نا کزیت آ ہڑزخواہی کرسا وزیراعظم پارے کہ آنجہانی ملکہ دولت مشترکہ نا شاری تیکن تحریک و واک انا ذریعہ ئسک۔ وزیراعظم پارے کہ پاکستان نا الس تون آنجہانی ملکہ نا پاکستان نا اِرا دورہ غاتا جوان ءُ یات آک ءُ۔ شاہی خاہوت و پاکستانی قوم انا نیام اٹ مہرومریبت نا رشتہ وخت اتون اوار اوار پین سوگو مس۔ وزیراعظم پاکستان نا الس و حکومت نا کنڈآن شاہ چارلس سوئم نا تخت نشینی آ اوڑکن نیک است خواہی نا درشانی ءِ کرے و دااومیت نا درشانی ءِ کرے کہ او دولت مشترکہ نا ملک آتا نیام اٹ سنگتی ءِ پین سوگو کننگ اٹ تینا لمہ نا میرات ءِ مون آ دیک۔ وزیراعظم مستی پارے کہ پاکستان نا الس شاہ چارلس سوئم نا بھاز شرف ءِ کیک و اونا زوت دورہ پاکستان آ بیابخیری نا خواہندار ءِ۔ وزیراعظم شاہی خاہوت نا کنڈآن بھلا نوکاپ نا رداٹ ہمدردی نا درشان و کمک آ برطانوی بادشاہ نا منت واری ءِ ہم ہرفے۔ اوپارے کہ برطانوی حکومت و الس ہڑتوم آتا کنڈآن پاکستان اٹی نوکاپ نا بابت ہمدردی و کمک نا پاکستان اٹ بھاز ستاءِ کننگا۔
