اسلام آباد۔ 18 ستمبر (اے پی پی) بنجائی وزیر ڈٹ بندی ، شونداری و اصلاحات احسن اقبال پارینے کہ موسمیاتی بدلی نا آفت ملک آ قیامت ایسونے ولے پاکستانی قوم انا جوزہ ناقابل تسخیر ءِ، نوکاپ نا بھسکاری تیان رکھ ہر پاکستانی نا فرض ءِ کہ او زہمی تا بحالی کن تینا بشخ ءِ شاغے، چنا و لمہ غاتے خور انا بھاز کاختی مون تروک ءِ ، داوخت آ ملک ءِ سیاست آخا کمکی کارروائی تیٹی بشخ ہلنگ نا گرج ءِ۔ یک شنبے نادے آ داڑے جاری بیان نا رداٹ بنجائی وزیر احسن اقبال تحصیل خیرپور ناتھن شاہ ٹی پاکستان نیوی نا جوڑ کروک خان پور ریلیف کیمپ نا جاچ ءِ ہلک۔ اودے صوبہ سندھ اٹی پاک نیوی نا ریسکیو مشن و ریلیف کیمپ انا بارواٹی حوال تننگا۔ اوکیمپ اٹی رہینگوک آ بندغ، سول سوسائٹی و انتظامیہ غان اوفتا مشکل آتا بارواٹی اَریفے۔ داوخت آ اوپارے کہ موسمیاتی بدلی نا آفت ملک آ قیامت ایسونے ولے پاکستانی قوم انا جوزہ ناقابل تسخیر ءِ ونن سیوت و یکجہتی اٹ دا بھسکاری نا مون ءِ توننگ اٹ سرسہب مرینہ۔ اوپارے کہ دا آفت نا بھسکاری نا مقابلہ ءِ شون ہلوک ءُ ملک اس ہم کننگ کپک ولے پاکستان نا الس، بنجائی حکومت و صوبائی حکومت آک سول سوسائٹی و پاکستان نا سنگت ملک آک غٹ اواری اٹ پورو توانائی تے خڑچ کننگ اٹی ءُ۔ اوپارے کہ نوکاپ آن زہمی ہم وطن تا مشکل آتے ہرسا سخت است والا بندغ ہم موم مریک۔ انسانیت دا آفت آن ہڑکی خلنگ ءِ۔ ہر ہمو پاکستانی ہرا نوکاپ نا بھسکاری تیان رکھ ءِ اوفتا فرض ءِ کہ زہمی تا بحالی کن تینا بشخ ءِ شاغر ۔ چناو لمہ غاتے خور انا سخت کاختی مون تروک ءِ ۔ این ڈی ایم اے داڑکن ہلہلہ ئی امداد گدریفنگ ءِ۔ اوسول انتظامیہ، سلہہ بند فوج و سول سوسائٹی نا بندغ آتے خراج تحسین پیش کرے ہرا چسپان مرسا دے و نن زہمی تا کمک ءِ کننگ ءُ۔ اوپارے کہ دُن تو 30 ارب ڈالر آن زیات نا نسخان مسنے ولے پاکستان نا زرگزران اٹی داخہ وس ارے کہ او دانسخان آن پیش تمنگ کے۔ پاکستان ءِ ملوک آ بحالی نا امداد آن روپئی ءِ سوگو کننگ اٹ کمک رسینگک۔ داوخت آ ملک ءِ سیاست آخا کمکی کارروائی تیٹی بشخ ہلنگ نا گرج ءِ۔
SMH
(آئٹم نمبر 19)
