وزیراعلیٰ پنجاب تون چیئرمین پاکستان علماکونسل حافظ محمد طاہر محمود اشرفی نا اوڑدہی

لاہور۔ 18 ستمبر (اے پی پی) وزیراعلیٰ پنجاب چوہدری پرویز الٰہی تون چیئرمین پاکستان علما کونسل حافظ محمد طاہر محمود اشرفی اوڑدہی کرے۔ وزیراعلیٰ چوہدری پرویز الٰہی پارے کہ سیرت اکیڈمی ءِ بحال و متحدہ علمابورڈ ءِ فعال کننگک۔ سیرت اکیڈمی ٹی ایم فل نا کلاس آتا بناءِ کننگک۔ مدینہ یونیورسٹی، جامعہ الازہر و عالم اسلام نا ایلو نمان جامعہ غاتا شریداری اٹ ایم فل کلاس آک مریرہ۔ متحدہ علمابورڈ ءِ فعال کرسا دین نا خذمت نا کاریم ءِ ہلنگک۔ اوپارے کہ سیرت اکیڈمی ءِ دین نا بابت مروک آ فیصلہ غاتا ہند اس جوڑ کننگک۔ سیرت اکیڈمی ٹی دینی نصاب آتا بابت پٹ وپولی کاریم ہم کننگک۔ بین المسالک و بین المذاہب ہم آہنگی کن کوشست آتے برجاتخنگک۔ نوکاپ اٹی زہمی مسیت و مدرسہ غاتا بحالی نا کاریم ءِ ہم کننگک۔ اوپارے کہ نوکاپ زہمی تا بحالی و آبادکاری کن قومی امنائی ودی کننگ کن غٹ کوشست آتے کاریم اٹ اتینہ۔ عرب ملک آک و اوفتا ادارہ غاتے پنجاب اٹی نوکاپ زہمی تیکن کمکی سرجزآتیٹی آسراتی ایتنہ۔ نوکاپ زدگان تا کمک کن شفاف وڑاٹ طے کننگانے ۔ چیئرمین پاکستان علماکونسل مولانا طاہر اشرفی نوکاپ زہمی تیکن وزیر اعلیٰ پرویز الٰہی نا کوشست آتا ستاءِ کرے۔ طاہر اشرفی پارے کہ دین نا خذمت کن وزیراعلیٰ چوہدری پرویز الٰہی نا خذمت آتے مدام یات تخنگک۔ متحدہ علما بورڈ ایکٹ اتنگ نا حکومتی فیصلہ نا تائید ءِ کینہ۔ ایم پی اے حافظ عماریاسر، راسخ الٰہی ، پرنسپل سیکرٹری وزیر اعلی محمد خان بھٹی، مسکوہی پرنسپل سیکرٹری وزیر اعلی جی ایم سکندر، مسکوہی صدر بینک آف پنجاب ہمیش خان و بڑزکو کمامدارآک ہم داوخت آ ساڑی ئسر۔