اسلام آباد۔ 18 ستمبر (اے پی پی) صدر مملکت ڈاکٹر عارف علوی مرکزی نظامت قومی بچت نا کنڈآن شرح منافع ٹی مستین نا نسبت کمتی ءِ بے ڈولی اس گوندسا بنجائی محتسب نا فیصلہ نا برخلاف زالبول شاری نا درخواست ءِ منظور کرے۔ ایوان صدر میڈیا ونگ آن جاری بیان نا رداٹ صدر مملکت قومی بچت ءِ اسپیشل سیونگ سرٹیفکیٹ آ ہلنگ نا وخت انا شرح ءِ منافع نا حساب اٹ شاری ءِ منافع ادا کننگ نا پارت کرسا پارے کہ قومی بچت منافع نا شرح ٹی موثر بہ ماضی کمتی کرسا بے ڈولی کرے، بیرہ پارلیمنٹ /کانود ساز ادارہ غاک کانود ءِ منظور مننگ آن مست انا تاریخ آن نافذ کننگ کیرہ۔ صدر مملکت پارے کہ کانود آن چپ منافع نا شرح ٹی نظرثانی آن شاری ءِ 53 لکھ روپئی نا نسخان مس۔ زالبول شاری قومی بچت آن پنچ سرٹیفکیٹ 12.7درسد، شش سرٹیفکیٹ 13.9 درسد منافع نا شرح اٹ ہلک، چار دے آن پد فنانس ڈویژن منافع نا شرہ ءِ نافذ بہ مستین کم کننگ نا نوٹیفکیشن جاری کرے، شاری سرٹیفکیٹ آتا جاری کننگ نا وخت انا شرح منافع نا رداٹ منافع نا حقدار ءِ۔ صدر مملکت پارے کہ شرح منافع ٹی بدلی نا اطلاق نوٹیفکیشن آن مست کروک آ زرکاری آ مفک، جاری کروک نوٹیفکیشن ماتحت یا تفویض مروک کانود سازی نا زمرہ ٹی بریک۔ صدر مملکت پارے کہ نوٹیفکیشن نا اطلاق سرکاری گزٹ اٹی تاریخ اشاعت آن مریک نئے کہ مہالو نا تاریخ آن ، حکومت کانود نا کنڈآن مجاز مف تو نافذ بہ ماضی حکم جاری کننگ نا اختیار تخپک، ہرپرمان سرکاری گزٹ اٹی اونا اشاعت نا تاریخ آن نافذ مریک۔ حکومت کن تینا عہد آن پدی مننگ سہی اف، ایفائے عہد کپننگ آن حکومتی ادارہ غاتیا الس نا پت چٹنگ کیک، حکومتی ادارہ غاتا تینا پیمان تون وفا کپننگ حکومتی ساکھ آ منفی اثرشاغک۔ ساڑی کانود طے شدہ کانودی اصول و سورہ المائدہ نا اولیکو آیت نا رداٹ قرآنی پرمان تیا مبنی ءِ، معاہدہ غاتے پورو کننگ منطقی و انصاف اٹ ءِ بلکن جہانی وڑاٹ قبول مروک اصول ءِ، ہڑتوم آ فریق آک سرٹیفکیٹ نا جاری کننگ نا وخت آ کروک آ معاہدہ غاتا پابند ءُ۔ صدر مملکت پارے کہ سرٹیفکیٹ آتیا 12.7 درسد و 13.9 درسد نا شرح نا حساب اٹ قول انا رداٹ منافع ادا کننگے۔ شاری منافع نا مروجہ شرح ءِ ہرسا قومی بچت آن سرٹیفکیٹ ہلک، خزانہ ڈویژن نا نوٹیفکیشن چاردے مست آن نافذ بہ ماضی منافع نا شرح ءِ کم کرے، شاری تینا غاو انا ازالہ کن قومی بچت و اوکان پد بنجائی محتسب تون رابطہ کرے۔ ریلیف ملپننگ آ شاری صدر مملکت ءِ درخواست دائر کرے ، ہرادے منظور کننگا۔
