اسلام آباد۔ 18 ستمبر (اے پی پی) پاکستان ریلویز مسافر آتے ہرممکن گچین آسراتی تا فراوانی نا رداٹ بھلا شار تا 20 ریلوائی اسٹیشن آتیا بڑزکو آب انا بیت الخلاء جوڑ کیک۔ وزارت ریلوائی نا اسہ کارندہ اس یک شنبے نادے آ اے پی پی ءِ پارے کہ دامسخت کن نجی بشخ انا خذمت آتے دوئی کننگک۔ اوپارے کہ لاہور، فیصل آباد، کراچی، راولپنڈی، کوئٹہ و پشاور تون اوار بھلا شار تا ریلوائی اسٹیشن تے اولیکو ریسہ ٹی پوسکن ءُ آسراتی دُوبریک۔ اوپارے کہ پاکستان ریلوائی مسافر آتا آسراتی کن مچ آ ملک انا پنچ بھلا ریلوائی اسٹیشن تے ہم پوسکن آ وڑتتون ہم گرنچ کیک۔ داوڑنا گام گیج آتیان محکمہ نا کٹیا ٹی ودکی مریک۔ اومستی پارے کہ ریلوائی اسٹیشن تے اپ گریڈ کننگ نا مسخت اوفتے کاروباری سرجز آتیکن واپاری ہند اس جوڑ کننگ و مسافر آتے ہرممکن آسراتی فراوان کننگ ءِ۔ اوپارے کہ کراچی، لاہور، فیصل آباد، پشاور و کوئٹہ نا ریلوائی اسٹیشن تے پوسکن آ وڑتیا اپ گریڈ کننگک۔ اومستی پارے کہ دا فیصلہ ءِ وزیر ریلوائی خواجہ سعد رفیق نا پارت آ بناکننگانے۔ ریلوائی کمامدارآک پاریر کہ حکومت پاکستان ریلوائی نا کارکڑد ءِ گچین کننگ کن چندی گام گیج کننگ اٹی ءِ تانکہ مسافر آتے زیات آن زیات آسراتی فراوان کننگ مرے۔ اسہ سوج اسے نا ورندی ٹی اوپارے کہ بلوچستان اٹی ریلوائی نا انفراسٹرکچر ءِ دوئی وسیلہ غاتا رداٹ برقرار تخنگ انگ ءِ تانکہ مسافر آتے رکھ سفر فراوان کننگ مرے۔ اوفک پاریر کہ بلوچستان اٹی ریلوائی ٹریک سبی۔ کوئٹہ۔ چمن، سپیزنڈ۔تفتان و سبی۔ہرنائی و جیکب آباد۔ سبی سیکشن نا گڑا س بشخ آتیا تالان ءِ۔
