اسلام آباد۔ 18ستمبر (اے پی پی) وزارت ہاؤسنگ و تعمیرات بنجائی دارالحکومت اسلام آباد اٹی ریٹائرڈ و ایماندار(مرحوم ) ملازم آتا خاہوت آتا برخلاف کانود کوزہ ٹی ہند آتے زوراکی اٹ خور کرفنگ نا ڈٹ اس جوڑ کرینے۔ اسٹیٹ آفس نا حوالی اے پی پی ءِ پارے کہ دا ڈٹ ءِ اینڈ ورکس مولانا عبدالواسع نا پارت آ تیار کننگ انگ ءِ ، ہراڑآن سرکاری ملازم آتا ہنکینی ویل آتے ایسر کننگ اٹ کمک رسینگک۔ اومستی پارے کہ دامسخت کن بنجائی شونداری ادارہ (سی ڈی اے) و اسٹیٹ آفس آن ہم کمک طلب کننگانے۔ اونا پاننگ ءِ کہ وزارت ہاؤسنگ بنجائی دارالحکومت اٹی سرکاری ہنکین تیان پیشن تجاوزات و غیرکانودی تعمیرات آتا برخلاف کانودی کارروائی ا ہم سجفنگ ءِ۔ اونا مستی پاننگ ءِ کہ ساڑی آ کارروائی تیٹی اسٹیٹ آفس داتم اسکان مچ آ ملک اٹی کم و ود 2،837 سرکاری کواٹرآتے غیرکانودی کوزہ گیر آتیان خورک کرفسا ملازم آتے الاٹ کرینے۔ سی ڈی اے و صوبائی حکومت آتا ایلو تعلقدار بشخ آک اسٹیٹ آفس ءِ سرکاری جائیداد آتے واگزار کرفنگ اٹ کمک کرینو۔ اسہ سوج اسے نا ورندی ٹی اونا پاننگ ئس کہ داوخت آ 25 ہزار آن زیات سرکاری ملازم ہنکین نا دوئی کننگ کن جنرل ویٹنگ لسٹ اٹی ءُ ہراجاگہ نا چاری ءُ۔ اوپارے کہ اسٹیٹ آفس ءِ میرٹ نا بنداو آ سرکاری ملازم آتے الاٹمنٹ جاری کننگ نا سخت پارت ءِ ہراڑآ عمل کننگ انگ ءِ و سپریم کورٹ نا پارت آتا رداٹ ہنکین الاٹمنٹ رولز 2002 نا رول A29نا رداٹ قاعدہ ٹی نرمی بیرہ ہارڈ شپ کیس آتیٹی کننگ مریک۔
