اسلام آباد۔23جون (اے پی پی): جون ءَ ابوظہبی ءَ پاکستان ءُ امارات ءِ یکجائی وزارتی کمیشن ءِ 12می دیوان ءَ نائب مزن وزیر ءُ درئی کارانی وزیر سینیٹر محمد اسحاق ڈار پاکستانی ڈل ءِ سروکی ءَ کنت۔ پاکستان ءُ امارات ءِ نیام ءَ دو نیمگی کمک ءِ واستہ مستریں ادارگی پلیٹ فارم ءِ بستار ءَ کار کنت۔ گند ءُ نند ءَ دوئیں براتیں ملک آنی نیام ءَ اسٹریٹجک، اقتصادی ءُ دیمروئی کمک ءَ را گیش ءُ گیوار کنگ ءِ ایجنڈا دیم ءَ برگ بیت۔ نائب مزن وزیر ءِ سروکی ءَ پاکستانی ڈل ءِ تہ ءَ اقتصادی امور، کامرس، توانائی، میری ٹائم امور ءُ تہی کاراں ہوار کلیدی وزارت آنی سیکرٹری ءُ مزنیں کارندہ ھوار بنت۔ امارات ءِ ڈل ءِ سروکی ءَ نائب مزن وزیر ءُ دری کارانی وزیر شیخ عبداللہ بن زاید النہیان بیت، وھدیکہ اماراتی سیادی داروکیں ادارگ آنی مزن تک ءِ نمائندگ ھم ھوار بنت۔ گند ءُ نند ءَ دو نیمگی کمک ءِ بازیں شوبگ آنی تہ ءَ پیشرفت ءِ چار ءُ تپاسی کنگ بیت ءُ تجارت، سرمایہ کاری، توانائی، بنیاتی ڈھانچگ ءِ دیمروئی ءُ آئی ٹی ءِ تہ ءَ کمک ءِ واستہ نوکیں راہ آنی پٹ ءُ پول کنگ بیت۔ دیوان ءِ ساھت ءَ شعبہ جات ءِ کمک ءَ را ادارگ جوڑ کنگ ءِ واستہ یک ٹولی یے ءِ قانونی کاگد آناں گڈی رنگ دیگ ءِ گمان اِنت۔ گند ءُ نند ءَ چہ دوئیں نیمگ آناں وتی اقتصادی اولویت آناں یکجا کنگ ءُ دوئیں نیمگ ءَ را فائدگ مندیں شریکداری ءِ دائرہ کار ءَ را گیش کنگ ءِ واستہ امکانات آناں پچ کنگ ءِ یک ھاسیں موہ ءِ پجارینگ بیت۔
