اسلام آباد۔ 17 ستمبر (اے پی پی) وزیراعظم محمد شہباز شریف ملکہ برطانیہ الزبتھ دوئم نا آخیریکو رسم آتیٹی بشخ ہلنگ کن ہفتہ نادے آ لندن آ سرمس۔ برطانوی وزیر خارجہ نا خصوصی نمائندہ ڈیوڈ گورڈن میک لیوڈ وزیراعظم پاکستان ءِ بالی پٹ آ بخیرکرے۔ ہفتہ نادے آ دفترخارجہ نا ترجمان اسہ بیان اسے ٹی پارے کہ برطانوی حکومت نا سلہ غا وزیراعظم تینا دورہ برطانیہ ٹی 19 ستمبر آ لندن اٹی آنجہانی ملکہ الزبتھ دوئم نا سرکاری رسم آتیٹی پاکستان نا نمائندگی ءِ کیک۔ برطانیہ ٹی اڈکننگ آن پد وزیراعظم اقوام متحدہ نا جنرل اسمبلی (یواین جی اے) نا 77 می دیوان نا بڑزکو کہولی شرہ غاتیٹی بشخ ہلنگ کن امریکہ غا روانہ مریک۔ بی بی سی نا رداٹ ملکہ نا آخیریکو رسم آتے 19 ستمبر آ ہندی وخت دے انا 11 بجہ غا ادا کننگک ہرا لندن نا ویسٹ منسٹر ایبی تاریخی چرچ اٹی ادا کننگک، ہراڑے برطانیہ نا بادشاہ و ملکہ نا تاج پوشی ہم کننگک۔ اونا آخیریکو رسم آک ماتمی دھن اتون ایسر مریرہ، اوکان پد اونا شرف اٹی اِرا منٹ انا قومی خاموشی اختیار کننگک۔
