اسلام آباد۔ 17 ستمبر (اے پی پی) وزیراعظم محمد شہباز شریف سخی تیان خواست کرینے کہ او نوکاپ زہمی تا کمک کن مون آ بریر، چنکا چناتے خور انا سخت گرج ءِ، یخ انا موسم اٹی بیرم و باسن آ پچ آتا گرج ءِ، بنجائی و صوبائی حکومت آک تینا غٹ وسیلہ غاتے کاریم اٹ اتنگ اٹی ءُ، زہمی تیٹی 25 ہزار روپئی فی کس انا حساب اٹ 30 ارب روپئی داتم اسکان بشخنگانے، بجلی نا اِرا تُو انا بل ءِ معاف کرینن۔ ہفتہ نادے آ برطانیہ غا روانگی آن مست نورخان ایئر بیس آ نوکاپ زہمی تا بحالی نا بابت جاچ دیوان آن تران کرسا وزیراعظم پارے کہ اوسمرقند اٹی شنگھائی کمکار تنظیم نا سروک دیوان نا وخت آ چین، ترکی، ایران و سینٹرل ایشیا نا سروک آتون اوڑدہی ٹی نوکاپ زہمی تا امداد آ اوفتا منت واری ءِ ہرفے وخت اس کہ دا ملک آتا سروک آتا کنڈآن پین امداد نا سلہ خلنگا۔ وزیراعظم پارے کہ دا سربراہان مملکت آتے حکومت نا کنڈآن نوکاپ زہمی تا ریسکیو و بحالی نا کاریم تیان معلومدار کرین۔ اوفتے پارین کہ تینا وسیلہ غاتیان ارب آ روپئی زہمی تیا خڑچ کننگ انگ ءِ، زہمی خاہوت آتے فی کس 25 ہزار روپئی تننگ اُن، داڑکن بنجائی حکومت 70 ارب روپئی جتا کرینے، ہرافتیان 30 ارب روپئی بشخنگانے، دا زر ءِ جہانی کہول آ مستند ساکھ تخوک بے نظیر انکم سپورٹ پروگرام نا کمک اٹ شفاف وڑاٹ بشخنگ انگ ءِ، داڑتون اوار اوار نسخان تا اسیجائی سروے ءِ ہم کننگ انگ ءِ تانکہ اسہ حقدار اس ہم حق آن محروم مف، داکان بیدس زہمی تا آبادکاری و بجلی نا بل آتا معافی نا بابت حکومتی گام گیج آتیان معلومدار کرین۔ اوپارے کہ صوبائی حکومت آک ہم بحالی نا کاریم تیٹی پبی بشخ ہلنگ اٹی ءُ۔ اوپارے کہ زہمی علاقہ غاتیٹی غٹ ادارہ، صوبائی حکومت آک اواری اٹ کاریم کننگ اٹی ءُ، دا سربراہان مملکت آتے پارین کہ نوکاپ زہمی علاقہ غاتیٹی پوسکن ودی مروک آ چناتا خور انا بھاز کاختی ءِ ، داڑکن سخی تیان ہم خواست ءِ کہ او دچناتا غذا و یخ انا موسم کن باسن ءُ ہچ و بیرم فراوان کیر، دامخلوق دا گڑاتے این جی او، بنجائی و صوبائی ادارہ، پاکستان نا فوج انا ریلیف کیمپ آتیٹی فراوان کننگ کیرہ، پوسکن ودی مروک آ چناتا غذانا جنگی بنداو تیا گرج ءِ، دا چناک لکھ آتا کچ اٹی ءُ، دابھاز بھلو انسانیت نا خذمت اس مریک، یخ انا موسم اٹی لکھ آ زہمیک بے چھت آن ننا کمک نا چاری ءُ۔ پاکستان اٹی رہینگوک آ صاحب حیثیت مخلوق آن خواست کہ او قرآن و سنت نا پیروی ءِ کرسا تینا زہمی ایلم تا کمک ءِ کیر، داڑآ مچ آ قوم اوفتا منت وار مریک۔
