نوکاپ آن زہمی علاقہ غاتیٹی 24 گھنٹہ ٹی زہمی تیکن اِرا ٹن کمکی گڑاتا فراوانی ءِ کننگانے، این ایف آر سی سی

اسلام آباد۔ 17 ستمبر (اے پی پی) ملک انا چندی علاقہ غاتیٹی 24 گھنٹہ ٹی موسم باسن و جمری ئسک ولے بڑزکو پنجاب نا گڑاس علاقہ غاتیٹی پِر مس۔ داوخت آ سبی ٹی زیات آن زیات درجہ حرارت 41 سینٹی گریڈ وخت اس کہ تربت ، نوکنڈی، موہنجوداڑو، روہڑی، نورپورتھل و خان پور اٹی درجہ حرارت 40 سینٹی گریڈ ریکارڈ کننگا۔ این ایف آر سی سی نا کنڈآن جاری کروک رپورٹ نا رداٹ بروک آ 24 گھنٹہ ٹی ملک انا زیات تر میدانی علاقہ غاتیٹی موسم بارُن سلک ولے خیبرپختونخوا ، کشمیر ، بڑزکو نیامی پنجاب و گلگت بلتستان نا گڑاس علاقہ غاتیٹی پِر انا گمان ءِ۔ نیشنل فلڈ ریسپانس کوآرڈنیشن سینٹر (این ایف آر سی سی ) پارینے کہ بنداوی پنجر و نجی ملکیت آتا نسخان نا حساب وکتاب نا رداٹ 12718 کلومیٹر سڑک و 390 پول آتے نسخان رسینگانے۔ پِر و نوکاپ آن زیات زہمی ضلع غاتا رپورٹ نا رداٹ سندھ انا ضلع قمبر شہداد کوٹ ، جیکب آباد ، لاڑکانہ، خیرپور، دادو، نوشہروفیروز ، ٹھٹھہ و بدین بھاز زہمی ضلع غاتیٹی اوار ءُ ہرافتے ٹی بلوچستان نا ضلع کوئٹہ، نصیر آباد، جعفر آباد، جھل مگسی، بولان ، صحبت پور و لسبیلا اوار ءُ۔ ہندا وڑ خیبرپختونخوا نا ضلع دیر، سوات، چارسدہ ، کوہستان ، ٹانک و ڈیرہ اسماعیل خان تون اوار پنجاب نا ڈی جی خان و راجن پور نا ضلع غاک اوار ءُ۔