اسلام آباد۔ 17 ستمبر (اے پی پی) شنگھائی کمکار تنظیم (ایس سی او ) نا سربراہان ریاست نا کونسل نا دیوان اِرادے برجاسلنگ آن پد سمرقند اٹی ایسر مس۔ وزارت خارجہ نا کنڈآن جاری اعلامیہ نا رداٹ 15 و 16 ستمبر آ سمر قند اٹی اڈ ہلوک ایس سی او نا سربراہان ریاست نا کونسل نا دیوان اٹی پاکستانی ڈل انا کماشی ءِ وزیراعظم محمد شہباز شریف کرے، کونسل نا سالانہ دیوان ایس سی او نا پلیٹ فارم آن مروک آ اہم دیوان مریک ہراٹی ایس سی او نا پلیٹ فارم آن آخبت نا ہدف آتا تعین کن اہم ءُ فیصلہ کننگک۔ ایس سی او نا سربراہان مملکت نا کونسل نا دیوان اٹی تنظیم نا غٹ ہشت باسک ملک آتا سروک آک بشخ ہلیرہ۔ ایس سی او نا چیئرمین نا حیثیت اٹ ازبکستان نا صدر ترکیہ نا صدر رجب طیب اردوان، آذربائیجان نا صدر الہام علیوف، آرمینیا نا وزیراعظم نکول پشنیان و ترکمانستان نا صدر سردار بردی مخامیدوف ءِ خصوصی وڑاٹ بشخ ہلنگ نا سلہ خلک وخت اس کہ ایس سی او نا آبزرور ملک آتیان ایران، منگولیاو بیلا روس ئسک ہم خصوصی بشخ ہلکر۔ ایس سی او نا سربراہان امنائی سمرقند اعلامیہ اس جاری کریر ہراٹی ایس سی او نا اجتماعی نقطہ نظر نا رداٹ اہم جہانی و علاقائی امور آ سجفنگا۔ داکان بیدس ایس سی او نا دیوان اٹی موسمیاتی بدلی، غذائی رکھ، انرجی سیکورٹی و قابل بھروسہ جہانی سپلائی چین نا بابت اسیجائی بیان ہم جاری کریر۔ ایس سی او نا راہشونک 2023-27نا جامع ایکشن پلان نا ہم منظوری ءِ تسر ہرانا رداٹ مریس مد اکن گچین ہمسائیگی ، سنگتی و کمکاری نا نظریہ ءِ مون آ دننگک۔ ایس سی او نا باسک ملک آک گچین زرگزرانی و ٹرانسپورٹ راہداری، ریگولیشنز تون اوار ایلو گام گیج آتے ہم پک کننگ اٹی ءُ، ہندا وڑ کونسل نا دیوان اٹی شنگھائی کمکار تنظیم نا پلیٹ فارم آن ایس سیا و نا باسک ملک آتا نیام اٹ ہندی کرنسی تیٹی واپار نا مون آ دننگ آ ہم سرجمی اٹ گپ وتران کننگا۔ ہندا وڑ ایس سی او نا دیوان اٹی 4 بین الحکومتی معاہدہ غاتیا ہم دستخط کننگا ہرافتے ٹی سیل وسوات نا مون آ دننگ اٹ کمکاری ، خذمت آتا واپار نا بشخ اٹی کمکاری ، عجائب گھر تا باندات آتیٹی کمکاری نا بابت مفاہمت نا یات داشت و پلانٹ کورنٹائن نا بشخ اٹی تین پہ تینی کمکاری نا مون آ دننگ نا معاہدہ غاک اوار ءُ۔ ایس سی او نا سربراہان مملکت و حکومتی سروک آک تنظیم نا دنگ ءِ پین تالان کننگ آ ہم امنا کریر و بیلاروس انا پورو رکنیت نا درخواست نا منظوری ءِ تسر۔ ہندا وڑ بحرین، متحدہ عرب امارات، کویت، مالدیپ و میانمار ءِ پوسکن آ ڈائیلاگ پارٹنر نا وڑاٹ تنظیم اٹی اوار کننگ نا درخواست نا ہم منظوری ءِتسر۔ وزیراعظم محمد شہباز شریف تنظیم نا دیوان اٹی ایس سی او نا تذویراتی ڈائریکشن نا رداٹ جہانی سیاسی و زرگزرانی حالیت آتا رداٹ پاکستان نا نقطہ نظر ءِ پیش کریر۔ ہندا وڑ پاکستان نا کنڈآن ایس سی او نا چارٹر و تنظیم نا ہدف آتا دوئی کننگ نا بابت پاکستان نا اصولی موقف ءِ ہم ولدا پاریر۔ تینا بیان اٹی وزیراعظم محمد شہباز شریف ایس سی او نا باسک ملک آتیا زور شاغا کہ او موسمیاتی بدلی تا نسخان تے کم آن کم کننگ کن جامع حکمت عملی نا رداٹ اسیجائی کوشست آتے پک کیر۔
