کراچی۔ 16 ستمبر (اے پی پی) بنجائی وزیر مواصلات و پوسٹل سروسز مولانا اسعد محمود پارینے کہ سکھر حیدر آباد موٹروے ءِ زوت تیار کرسا سندھ انا الس ءِ بھلو ٹیکی اس ایتنہ، این ایچ اے کمامدارآک قومی شاہراہ تا بحالی ٹی لگوک ءُ، ہائی وے تیا ٹریفک نا روانی ءِ برقرار تخنگ کن موٹروے پولیس الرٹ ءِ۔ داخیال آتا درشانی ءِ او سندھ اٹی نوکاپ نا حالیت، سکھر حیدر آباد موٹروے نا جوڑ کننگ نا بابت کمشنر آفس حیدر آباد اٹی اہم جاچ دیوان اٹی گپ وتران کرسا کرے۔ دیوان اٹی وزیراعلیٰ سندھ مراد علی شاہ، بنجائی وزیر مواصلات مولانا اسعد محمود، سیکرٹری مواصلات کیپٹن ر خرم آغا، علامہ راشد سومرو، شرجیل انعام میمن، صوبائی وزیر آک، این ایچ اے کمامدارآک، موٹروے پولیس وایلو ادارہ غاتا نمائندہ غاک ساڑی ئسر۔ دیوان اٹی سکھر آن حیدر آباد موٹروے ءِ زوت جوڑ کننگ آ امنا کننگا۔ دیوان اٹی سندھ و بنجائی حکومت نا اسیجائی جہد اٹ شاہراہ تے دے و نن ءِ اسٹ کرسا بحال کننگ آہم امنا مس ۔ دیوان اٹی این ایچ اے کمامدارآک سندھ اٹی نوکاپ نا حالیت آتیا حوال تسروخت اس کہ موٹروے پولیس ٹریفک نا روانی نا بابت حوال تس۔ وزیراعلیٰ سندھ مراد علی شاہ این ایچ اے نا گام گیج آتا ستاءِ کرے و پارے کہ سندھ اٹی نوکاپ نا سوب آن بھلو کچ اسے آ نسخان مسنے، صوبائی و قومی شاہراک زہمی مسنو ہرافتا بحالی کن اسیجائی کوشست آتا گرج ءِ۔ بنجائی وزیر مواصلات پارے کہ سکھر حیدر آباد موٹروے زوت تیار کرسا سندھ انا الس ءِ بھلو ٹیکی اس ایتنہ۔ اوپارے کہ قومی و صوبائی شاہراہ تا بحالی این ایچ اے نا اولیت ءِ و این ایچ اے کمامدارآک قومی شاہراہ تے بحال کننگ کن دے و نن کوشست کننگ اٹی ءُ۔ مولانا اسعد محمود پارے کہ غٹ وسیلہ غاتے کاریم اٹ اتنگ اُن ولے دا کوشست آتے ترند کننگ کن صوبائی حکومت نا ہم کمک درکار ءِ، اسیجائی کوشست آتے اٹ دا زمواری ءِ زوت آن زوت پورو کننگ مریک۔ اوپارے کہ ہائی وے تیا ٹریفک نا روانی ءِ برقرار تخنگ کن موٹروے پولیس الرٹ ءِ۔
