سمرقند۔ 16 ستمبر (اے پی پی) تاجکستان، ازبکستان ، ایران و منگولیا نا صدر آک وزیراعظم شہباز شریف نا موسمیاتی بدلی نا ویل ءِ شنگھائی کمکار تنظیم نا کنڈآن ہرفنگ نا سلاہ نا پبی تائید و مخ تفی نا پڑو ءِ کرینو۔ وزیراعظم نا میڈیا ونگ آن جاری بیان نا رداٹ ازبکستان نا صدر شوکت مرزیوف ایس سی او ریاستی سروک آتا کونسل نا ہندا دیوان نا مہمانداری ءِ کرسا زور شاغا کہ وزیراعظم پاکستان نا پیش کروک سلاہ تے ایس سی او تنظیم نا کہول آ چست کننگے۔ ایس سی او نا سربراہان مملکت نا کونسل نا دیوان اٹی تاجکستان نا صدر امام علی رحمان وزیراعظم شہباز شریف نا سلاہ نا غٹ آن مست مخ تفی نا پڑو ءِ کرینے۔ ایس سی او سربراہان مملکت نا کونسل نا ساڑی آ دیوان نا سروک تاجکستان نا صدر امام علی رحمان آن پد تنظیم نا سیکرٹری جنرل ، ازبکستان ، منگولیا و ایران نا صدر آک ہم پاکستان تون یکجہتی و مخ تفی نا پڑو ءِ کریر۔ تاجکستان نا صدر شوکت مرزیوف ایس سی او نا باسک ملک آتیا زور شاغا کہ ساڑی آ تاریخی نوکاپ آن مروک آ بھسکاری تتون مون تننگ اٹ پاکستان ءِ پبی کمک و مخ تفی فراوان کننگے۔
