سمرقند۔ 16 ستمبر (اے پی پی) وزیراعظم محمد شہباز شریف پارینے کہ موسمیاتی بدلی ، دینی مرض و ودوک آ بے بریبری کون آ چیلنج آتون اقوام متحدہ نا چارٹر نا رداٹ غٹ قوم تا کمک اٹ ہی مون تننگ مریک۔ وزیراعظم آفس میڈیا ونگ آن جاری بیان نارداٹ وزیراعظم شہباز شریف جمعہ نادے آ سمرقند اٹی شنگھائی کمکار تنظیم نا 22 می سربراہان مملکت نا دیوان نا وخت آ چینی صدر شی جن پنگ تون اوڑدہی کرے۔ اپریل 2022 اٹی وزارت عظمیٰ نا منصب ءِ سنبھالنگ آن پد چین نا صدر تون وزیراعظم شہباز شریف نا دا اولیکو اوڑدہی ءِ۔ ہڑتوم آ راہشون تا نیام اٹ تین پہ تینی پت و افہام وتفہیم نا چاگڑد اٹی خوشگوار گپ وتران مس۔ تینا خیر گامی ہیت آتیٹی چینی صدر وزیراعظم محمد شہباز شریف ءِ ’’عملیت پسندی و کارکڑد نا حامل شخصیت ‘‘ اس گوندا۔ اوپارے کہ وزیراعظم ’’چین پاکستان سنگتی کن دیرینہ عزم‘‘ تخوک آ راہشون ءِ۔ ہڑتوم آ راہشونک ہڑتوم آ کنڈآتا تعلقداری نا غٹ پلو آتا جاچ ءِ ہلکر و تین پہ تینی است خواہی نا اہم علاقائی و جہانی امور آ گپ وتران کریر۔ وزیراعظم صدر شی جن پنگ و چینی کمیونسٹ پارٹی نا بروک آ 20 می سی پی سی قومی کانگریس کن نیک است خواہی نا درشانی ءِ کرے۔ وزیراعظم داہیت آ زور شاغا کہ شنگھائی کمکار تنظیم تینا اسیجائی وژن و تین پہ تینی قدر ءِ علاقائی کمک و یکجہتی نا پبی عملی ڈٹ آتیٹی مون آ دننگ کن اسہ گچین ءُ فورم اس فراوان کرے۔ چین پاکستان پائیدار ہڑتوم آ کنڈآتا تعلقداری نا ذکر ءِ کرسا وزیراعظم داہیت آ زور شاغا کہ ننا ہر موقع غا آزموندہ تزویراتی شریداری’آل ویدر اسٹریٹجک کوآپریٹو پارٹنر شپ و آہنی ایلمی وخت انا کسوٹی نا مقابلہ ءِ کرے۔ اوتینا ہڑتوم آ کنڈآتا تعلقداری تے پین بڑی تسکان دننگ نا تینا جندی عزم انا درشانی ءِ کرے ۔ وزیراعظم پاکستان اٹی نوکاپ آن زہمی بندغ آتا است بھلنی و وخت آ کمک آ صدر شی جن پنگ، چینی حکومت و الس نا منت واری ءِ ہرفے۔ اوپارے کہ پاکستان چین نا غٹ حلقہ غاتا کنڈآن ہمدردی و مخ تفی نا درشانی آ منت وار ءِ و دا ننا یکتا سنگتی نا حقی ڈیک ءِ۔ اوصدر شی جن پنگ اتون 5 ستمبر 2022 آ صوبہ سیچوان اٹی بروک آ زمی جمب آن مروک آ است ہسون جانی نسخان و بھسکاری آ ہڑزخواہی نا درشانی ءِ کرسا پارے کہ پاکستان نا حکومت و الس دا قدرتی آفت اٹی چین اتون سلوک ءُ۔ وزیراعظم صدر شی جن پنگ ءِ پاکستان نا پائیدار شونداری، صنعتی شونداری، کشاری جدت و علاقائی رابطہ غاتیکن تینا حکومت نا پالیسی تیان معلومدار کرے۔ وزیراعظم پاکستان نا راجی و اقتصادی شونداری آ سی پیک انا مثبت اثرآتا ستاءِ کرے۔ اوسی پیک نا شونداری کن تینا حکومت نا عزم انا درشانی ءِ کرے۔ ہڑتوم آ راہشونک ایم ایل ون ریلوائی پروجیکٹ نا فریم ورک معاہدہ نا پروٹوکول آ دستخط نا ستاءِ کریر۔ وزیراعظم تائیوان، تبت، سنکیانگ وہانگ کانگ تون اوار بنداوی فائدہ نا غٹ ویل آتیا پاکستان نا چین اتون آخبتی و بدل مفروک مخ تفی نا درشانی ءِ کرے۔ اوپاکستان نا وتواجہی و علاقائی سالمیت ، ایف اے ٹی ایف، قومی شونداری، کوویڈ۔ 19 دینی مرض و ایلو بشخ آتیٹی کمکاری آ چینی حکومت نا منت واری ءِ ہم ہرفے۔ وزیراعظم جہانی حالیت آتیا گپ وتران کرسا پارے کہ موسمیاتی بدلی ، دینی مرض و ودوک آ بے بریبری کون آ چیلنج آتون اقوام متحدہ نا چارٹر نا رداٹ غٹ قوم تا کمک اٹ ہی مون تننگ مریک۔ اوصدر شی نا وژنری بیلٹ اینڈ روڈ انیشی ایٹیو و گلوبل ڈویلپمنٹ انیشی ایٹیو نا ستاءِ کرے۔ ہرا پائیدار و اجتماعی شونداری نا یکجا پالیسی ءِ دنیاٹی درستی راستی کرفے۔ وزیراعظم بھارت نا کوزہ گیری ٹی جموں و کشمیر اٹی انسانی حق انا بھلا حالیت آتے مون آ تخا و جموں وکشمیر نا جھیڑہ غا چین نا اصولی موقف آ منت واری ءِ ہرفے۔ ہڑتوم آ راہشونک ساڑی آ دوراٹی اسیجائی آخبت کن پاک چین کمیونٹی نا تعمیر نا عزم انا درشانی ءِ کریر۔ وزیراعظم صدر شی جن پنگ ءِ پاکستان نا سرکاری دورہ ءِ کننگ نا سلہ ءِ خلسا پارے کہ پاکستانی الس اونا جم و جوش اٹ بخیر کننگ نا چاری ءِ۔ سلہ ءِ امنا کرسا صدر شی پارے کہ او زوت آن زوت وزیراعظم شہباز شریف نا دورہ چین نا چاری ءِ۔
