شنگھائی کمکار تنظیم پاکستان اٹی نوکاپ نا حالیت آتون مون تننگ کن کمک کے، جہانی برادری مون آ برسا پاکستان نا کمک ءِ کے، وزیر اعظم شہباز شریف

سمرقند۔ 16 ستمبر (اے پی پی ) وزیراعظم شہباز شریف شنگھائی کمکار تنظیم آ زور شاغانے کہ دہشت گردی نا چٹفنگ ، چاگڑدی بدلی تون مون تننگ و اوغانستان اٹی سوگوی ٹی تینا کڑد ءِ ادا کے، پاکستان اٹی نوکاپ نا تباہ کن حالیت آتون مون تننگ کن ایس سی او و جہانی برادری کمک کن بایدے مون آ بریر، پاکستان ایس سی او نا مسخت آتا دوئی کننگ کن پبی کڑد ادا کیک۔ او جمعہ نادے آ داڑے شنگھائی کمکار تنظیم نا سروکی دیوان آن تران کریکہ۔ وزیراعظم پارے کہ اوغانستان و پاکستان ہمسایہ ملک ءُ، اوغانستان اٹی امن پاکستان اٹی امن نا ضمانت ءِ، اوپارے کہ اوغانستان ءِ گوجالنگ بھلو ردینک اس مریک، اوغانستان اٹی امن نا ڈیہہ غا مثبت اثر تمک،  وزیراعظم شنگھائی کمکار تنظیم و جہانی برادری آ زور شاغا کہ او اوغانستان نا کمک و ملک انا زرگزرانی و سیاسی سوگوی کن تینا کڑد ءِ ادا کیر۔ اودا اومیت نا درشانی ءِ کرے کہ اوغانستان نا حکومت ہم خاص وڑاٹ اقلیت و زالبول آتون اوار انسانی حق انا شرف ءِ کیک، وزیراعظم پارے کہ پاکستان ہم دہشت گردی نا گواچی مسنے و نن دہشت گردی نا برخلاف جنگ اٹی بھلو قیمت اس تسونن، داجنگ اٹی ننا سیکورٹی فورس و الس تینا جون تے ندر کرینو۔ اوپارے کہ شنگھائی کمکار تنظیم نا پلیٹ فارم آن ننے اواری اٹ دہشت گردی نا عفریت تون مون تروئی مریک، وزیراعظم پاکستان اٹی ساڑی آ نوکاپ آن مروک آ بھسکاری تا بارواٹی ہم شنگھائی کمکار تنظیم نا باسک ملک آتا سروک آتے معلومدار کرے و پارے کہ پاکستان اٹی چارسد چناتتون اوار 1400 بندغ ءِ دیر درینے ، لکھ آ ایکڑ آ سلوک فصل آک بھس و لکھ آ مخلوق بے اُرا مس، پاکستان اٹی نوکاپ آن داخہ در بھلو بھسکاری مہالو مون آ بتنے، لکھ آ ساہدار تے دیر درے، سلوک نوکاپی دیر آن وڑوڑنا ناجوڑی تالان مننگ اٹی ءِ ، ارب آ ڈالر نا نسخان مسنے، دامشکل وخت اٹی شنگھائی کمکار تنظیم و جہانی برادری پاکستان نا کمک ءِ کیر، وزیراعظم شنگھائی کمکار تنظیم آ زور شاغاکہ چاگڑدی بدلی تتون مون تننگ اٹ پاکستان نا کمک ءِ کے، پاکستان اٹی ساڑی آ نوکاپ موسمیاتی بدلی و اونا نتیجہ ٹی بھلا پِر تا نتیجہ ءِ ہراڑآن مچ آ ملک زہمی مسنے و بھلو بشخ اس دِیر اٹی ڈبنگانے، پاکستان نا گلوبل وارمنگ اٹی بشخ مفننگ نا بریبر وخت اس کہ داڑآن غٹ آن زیات زہمی ملک آتیٹی پاکستان اوار ءِ ، جہانی برادری و شنگھائی کمکار تنظیم دا حالیت آتون مون تننگ کن پاکستان نا کمک ءِ کیر، وزیراعظم شنگھائی کمکار تنظیم نا پوسکن آ سٹریٹجک پارٹنربشمول سعودی عرب، ترکی، بحرین ، قطر میانمار و ایلو فتے شنگھائی کمکار تنظیم اٹی بخیر اٹ پارے و دااومیت نا درشانی ءِ کرے کہ دا تنظیم پین سوگو مریک۔ وزیراعظم باور کرفے کہ شنگھائی کمکار تنظیم نا مسخت آتا دوئی کننگ کن پاکستان پبی کڑد ادا کیک۔