چینی صدر نا ایران ءِ شنگھائی کمکار تنظیم نا باسک مننگ آ مبارکباد

سمرقند۔ 16 ستمبر (اے پی پی) چینی صدر ایران ءِ شنگھائی کمکار تنظیم (ایس سی او ) نا آخبت پورو رکنیت آ مبارکباد پیش کرینے۔ چینی خبر رساں ادارہ نا رداٹ صدر شی جن پنگ ازبکستان نا دارالحکومت سمرقند اٹی ایرانی صدر ابراہیم رئیسی تون جمعہ نادے آ اسہ اوڑدہی اسے ٹی پارے کہ چین شنگھائی کمکار تنظیم نا فریم ورک نا رداٹ ایران تون ہم گرنچی و کمکاری ءِ سوگو کننگ نا خواہندار ءِ۔ اوزور شاغا کہ چین ایران نا قومی وتواجہی و وقار نا رکھ انا مخ تفی ءِ کیک و تہہ نا باندات آتیٹی نیام تمپننگ نا اصول ءِ برقرار تخنگ و پدتموک ملک آتا اسیجائی فائدہ غاتا رکھ اکن ایران تون اواری اٹ کاریم کننگ کن تیار ءِ۔ یات سلے کہ ایران تدوک آ دے شنگھائی کمکار تنظیم نا پورو باسک ملک جوڑ مسنے و او تنظیم نا باسک ملک آتیکن اسہ کرنسی اسے نا سلاہ پیش کرینے۔ ایران نا وزیر خارجہ حسین امیر عبداللہیان سوشل میڈیا غا جاری بیان اٹی پارے کہ نن ازبکستان نا شار سمر قند اٹی شنگھائی کمکار تنظیم نا سیکرٹری جنرل زانگ منگ تون اوار رکنیت نا میمورنڈم آ دستخط کرینن۔ اوپارے کہ پورو رکنیت آن پد شنگھائی کمکار تنظیم نا باسک ملک آتون ننا تین پہ تینی تعلقداری اسہ پوسکن ءُ ریسہ سے ٹی داخل مسنے۔ شنگھائی کمکار تنظیم 1996 ٹی چین نا شار شنگھائی ٹی ، قزاخستان، کرغزستان و تاجکستان نا نمائندہ غاتا نیام اٹ ، سیمی علاقہ غاتیٹی فوجی سلامتی نا سمجھوتہ اتون جوڑ مس۔ ازبکستان، پاکستان و بھارت نا پورو رکنیت آن پد باسک ملک آتا کچ 8 مس۔ ایران 2005 نا دیوان اٹی بحیثیت مبصر ملک بشخ ہلک و ستمبر 2021 اٹی ایران نا پورو رکنیت نا ریسہ نا بناءِ کرفنگا۔